అల్వాల్: పెళ్లికి నిరాకరించిన ప్రియుడు.. యువతి ఆత్మహత్య

ప్రేమించిన వాడు ముఖం చాటేశాడని ఓ యువతి పురుగుల మందు తాగి ప్రాణాలు తీసుకుంది. హైదరాబాద్‌లోని అల్వాల్‌లో ఈ విషాదం చోటుచేసుకుంది. అల్వాల్‌లోని కానాజీగూడకు చెందిన అనిత (17) అనే అమ్మాయి పదో తరగతి వరకు చదివి ఇంట్లోనే ఉంటోంది. ఆమెకు స్థానికంగా బేకరీ నడుపుతున్న జగ్గూ అనే యువకుడితో పరిచయం ఏర్పడింది. ఆ పరిచయం కాస్త ప్రేమగా మారింది.

పెళ్లి చేసుకుంటానని చెప్పి అనితతో చెట్టాపట్టాలేసుకుని తిరిగిన జగ్గూ.. కొంత కాలంగా మాట మార్చినట్లు ఆరోపణలు వస్తున్నాయి. పెళ్లి మాట ఎత్తితే ప్రియుడు ముఖం చాటేయడంతో అనిత మనస్తాపానికి గురైంది. శుక్రవారం (సెప్టెంబర్ 28) ఉదయం ఇంట్లో ఎవరూ లేని సమయంలో పురుగుల మందు తాగి ఆత్మహత్య చేసుకుంది.

సమాచారం అందుకున్న ఆల్వాల్‌ పోలీసులు ఘటనా స్థలికి వెళ్లి వివరాలు సేకరించారు. మృతదేహాన్ని పోస్టుమార్టం నిమిత్తం గాంధీ ఆస్పత్రికి తరలించారు. ఘటనపై కేసు నమోదు చేసుకుని దర్యాప్తు చేపట్టారు. జగ్గూ మోసం చేయడం వల్లే అనిత ప్రాణాలు తీసుకుందని, అతణ్ని అరెస్టు చేసి చట్టరీత్యా చర్యలు తీసుకోవాలని ఆమె కుటుంబసభ్యులు పోలీసులకు ఫిర్యాదు చేశారు.