రంగారెడ్డి జిల్లాలో బోరుబావిలో పడిన చిన్నారి

18 నెలల చిన్నారి బోరు బావిలో పడిపోయిన ఘటన గురువారం సాయంత్రం రంగా రెడ్డి జిల్లా చేవెళ్ల మండలం ఇక్కారెడ్డిగూడలో చోటుచేసుకుంది. సమాచారం అందుకున్న ప్రభుత్వ అధికార యంత్రాంగం ఘటనాస్థలానికి చేరుకుని సహాయక చర్యలు ముమ్మరం చేశారు. రవాణా శాఖ మంత్రి పట్నం మహేందర్ రెడ్డి ఘటనాస్థలం వద్దే వుండి పరిస్థితిని స్వయంగా సమీక్షిస్తున్నారు.

బోరుబావిలోకి పైపు ద్వారా ఆక్సిజన్ సరఫరా చేస్తున్న సహాయక సిబ్బంది మరోవైపు బోరు బావికి సమాంతరంగా జేసీబీల సహాయంతో భారీ గొయ్యి తవ్వుతున్నారు. ఎప్పుడు, ఏ క్షణం ఏం జరుగుతుందా అనే ఆందోళన ఇక్కారెడ్డిగూడలో నెలకొని వుంది. బోరుబావుల్లో చిన్నారులు పడి దుర్మరణంపాలవుతున్న దుర్ఘటనలు తరచుగా చోటుచేసుకుంటున్నా... తెరిచి వుంచిన బోరు బావులని స్వచ్ఛందంగా మూసేయడంలో బోరుబావుల యజమానులు నిర్లక్ష్యం వహిస్తుండటం, వారిపై కఠిన చర్యలు తీసుకోకుండా అధికార యంత్రాంగం వ్యవహరిస్తుండటంపై పలు విమర్శలు వ్యక్తమవుతున్నాయి.