సినిమా హాలు కిటికీ నుంచి పడి బాలుడి మృతి.. ‘లయన్ కింగ్’ చూడటానికి వెళ్తే విషాదం

తమ పిల్లలకు ‘ది లయన్కింగ్’ సినిమా చూపిద్దామని సరదా పడ్డ ఆ తల్లిదండ్రులకు తీవ్ర విషాదం ఎదురైంది. సినిమా హాలు కిటికీలో నుంచి మూడేళ్ల చిన్నారి ప్రమాదవశాత్తూ కిందపడి దుర్మరణం పాలైన ఘటన హైదరాబాద్‌లోని అబిడ్స్‌లో చోటుచేసుకుంది. ఆదివారం (జులై 21) అర్ధరాత్రి వెలుగులోకి వచ్చిన ఈ ఘటనకు సంబంధించిన వివరాలు ఇలా ఉన్నాయి..

నాంపల్లిలోని రెడ్ హిల్స్‌లో నివాసం ఉంటున్న పవన్ కుమార్, శిరీష దంపతులు ఆదివారం రాత్రి వారి ఇద్దరు పిల్లలతో కలిసి ‘ది లయన్ కింగ్’ సినిమా చూసేందుకు అబిడ్స్‌లోని సంతోష్ థియేటర్‌కు వచ్చారు. ఇంటర్వెల్ వరకు పిల్లలతో కలిసి ఆనందంగా సినిమా చూశారు. రాత్రి 7.30 గంటల సమయంలో విరామ సమయంలో శిరీష తన కుమార్తెతో పాటు కుమారుడు పృథ్వీ(3)తో కలిసి బాల్కనీకి వచ్చారు.

మొదటి అంతస్తులో ఉన్న బాల్కనీలోని కిటికీ నుంచి చిన్నారి పృథ్వీ కిందకి జారిపడ్డాడు. తీవ్ర గాయాల పాలైన చిన్నారిని తల్లిదండ్రులు వెంటనే దగ్గరలోని ఓ ప్రైవేట్ ఆస్పత్రికి తరలించారు. అక్కడ చికిత్స పొందుతూ పృథ్వీ సోమవారం వేకువజామున ప్రాణాలు విడిచాడు.

తమ కుమారుడి మృతికి సినిమా థియేటర్ యాజమాన్యం నిర్లక్ష్యమే కారణమని బాలుడి తల్లిదండ్రులు ఆరోపించారు. కనీస భద్రతా ప్రమాణాలు పాటించకపోవడం వల్లే తమ చిన్నారి మరణించాడని ఆవేదన వ్యక్తం చేశారు. బాలుడి తండ్రి ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై సైదులు తెలిపారు.