హరికృష్ణతో సెల్ఫీ దిగిన ఆ నలుగురిపై వేటు

తీవ్ర గాయాలతో చావుబతుకులతో పోరాడుతున్న హరికృష్ణతో సెల్ఫీలు దిగిన కామినేని ఆసుపత్రి సిబ్బందిపై యాజమాన్యం వేటు వేసింది. ఇటీవల ఘోర రోడ్డు ప్రమాదానికి గురైన హరికృష్ణను నల్గొండ జిల్లాలోని కామినేని ఆసుపత్రిలో చేర్చిన సంగతి తెలిసిందే. ఆయన అక్కడ చికిత్స పొందుతున్న సమయంలో నలుగురు సిబ్బంది సెల్ఫీ తీసుకున్నారు.

ఆ ఫొటో సోషల్ మీడియాలో వైరల్‌గా చక్కర్లు కొట్టడంతో కామినేని ఆసుపత్రి యాజమాన్యం స్పందించింది. ఆ నలుగురి సిబ్బందిని సస్పెండ్ చేసినట్లు ప్రకటించింది. ‘‘మా కామినేని ఆసుపత్రిలో రోగులు, వారి కుటుంబ సభ్యుల ఆరోగ్య వివరాలు చాలా గోప్యంగా ఉంచుతాం. కానీ, మా సిబ్బందిలో కొంతమంది చేసిన తప్పిదం వల్ల వ్యక్తిగత గోప్యతకు భంగం కలిగింది. మా సిబ్బందిలో కొందరి అనాగరిక, అమానుష ప్రవర్తన వల్ల ఈ తప్పిదం జరిగింది. ఈ విషయాన్ని మేం తీవ్రంగా ఖండిస్తున్నాం. వారిని విధుల నుంచి తొలగించాం. ఇటువంటివి మళ్లీ జరగకుండా చర్యలు తీసుకుంటాం. మా ఆసుపత్రి తరఫున హరికృష్ణగారి శ్రేయోభిలాషులు, అభిమానులకు క్షమాపణలు తెలుపుకుంటున్నాం’’ అని ప్రకటనలో వెల్లడించారు.