చిన్నారి రమ్యలాగే... సంజన బలి

తాగుబోతుల ర్యాష్ డ్రైవింగ్‌కు మరో చిన్నారి బలై పోయింది. చిన్నారి రమ్య ఉదంతాన్ని ఇంకా మర్చిపోక ముందే... మరో పాప తల్లి కళ్లముందే ప్రాణాలు కోల్పోయే పరిస్థితికి చేరుకుంది. పూర్తి వివరాల ప్రకారం... హైదరాబాద్ నగర శివారులో హయత్ నగర్ మండలం పెద్ద అంబర్ పేట్ వద్ద చిన్నారి సంజన (4) తల్లి శ్రీదేవితో కలిసి బస్సు కోసం వేచి ఉంది. అప్పుడే మద్యం తాగిన యువకులు అటుగా కారు డ్రైవ్ చేసుకుంటూ వచ్చారు. మత్తులో తల్లీ కూతుళ్ల మీదకు కారును పోనిచ్చారు. ఈ ఘటన సంజన, శ్రీదేవి తీవ్రంగా గాయపడ్డారు. ప్రమాదం జరగ్గానే యువకులు కారును అక్కడే వదిలి పారిపోయారు. తల్లీకూతుళ్లిద్దరినీ 108 వాహనంలో దగ్గర్లోని ప్రైవేటు ఆసుపత్రికి తీసుకెళ్లారు. చిన్నారి సంజన బ్రెయిన్ డెడ్ అయినట్టు వైద్యులు ప్రకటించారు. తల్లికి చికిత్స అందిస్తున్నారు. సంజన పక్కటెముకలు విరిగినట్టు కూడా వైద్యులు గుర్తించారు. ప్రమాదానికి కారణమైన యువకులను పట్టుకునేందుకు పోలీసులు ప్రయత్నిస్తున్నారు. కారులోనే మద్యం బాటిళ్లు, సగం తిన్న ఆహారం దొరికాయి.