యువతికి 76 ఏళ్ల వృద్ధుడి వేధింపులు.. పట్టేసిన షీ టీమ్

ఈ ముసలోడు మహా తుంటరోడు. ఎంత తుంటరంటే తన మనవరాలి వయసున్న యువతిని తనతో లాంగ్‌డ్రైవ్‌కి రావాలని వేధించేటంత. 76 ఏళ్ల వయసులోనూ ఎలాంటి సిగ్గు సెరం లేకుండా ఓ యువతిని ఫోన్‌లో పదేపదే వేధిస్తుంటే.. ఇక తట్టులేక ధైర్యం చేసిన ఆ అమ్మాయి షీ‌టీమ్స్‌కి సమాచారం ఇచ్చింది. విచారణ చేపట్టిన షీ టీమ్స్.. ముసలోడి ఇంటికెళ్లిమరీ పట్టి తెచ్చేశారు. ఇంతకీ ఈ ముసలోడి ఈవ్ టీజింగ్ ఎలా మొదలైందో చదవండి.

ఎంబీఏ చదువుతున్న 24 ఏళ్ల యువతి ఈ నెల 18న తన తాతయ్యతో కలిసి హైదరాబాద్‌లోని కుషాయిగూడ సాయిబాబా గుడికి వెళ్లింది. అయితే ఆమె తాతయ్య ఉన్నట్టుండి కుప్పకూలిపోయాడు. ఇది గమనించిన 76 ఏళ్ల మరో వృద్ధుడు వాళ్లకు సాయం చేశాడు. తన మోటార్ సైకిల్‌పై ఆ యువతి తాతయ్యను ఇంటి దగ్గర వదిలిపెట్టాడు. ఆ సమయంలో ఆ యువతి ఫోన్ నెంబర్ తీసుకుని, ఇంటికెళ్లాక ఫోన్ చేసి మాట్లాడాడు. మొదట చాలా బాగా మాట్లాడిన ముసలోడు.. తరవాత తనతో లాంగ్‌డ్రైవ్‌కు రావాలని కోరాడు. దీంతో షాకైన ఆ యువతి ముసలోడి ఆఫర్‌ను సున్నితంగా తిరష్కరించింది.

అయినప్పటికీ ముసలి ప్రాణం కుదురుగా ఉండలేదు. పదేపదే ఫోన్ చేసి వేధించాడు. దీంతో విసుగుపోయిన ఆ యువతి వాట్సాప్ ద్వారా రాచకొండ షీ టీమ్‌ను ఆశ్రయించింది. ఆ వృద్ధుడు కుషాయిగూడలో ఉంటున్నట్లు గమనించిన రాచకొండ సిబ్బంది కుషాయిగూడ షీటీమ్‌కు సమాచారమిచ్చారు. కేసును దర్యాప్తు చేసిన కుషాయిగూడ ఏఎస్సై మల్లేశ్ యాదవ్.. వృద్ధుడి పేరు వినోద్ దేవాన్ అని, కుషాయిగూడ సైనిక్‌పురిలోని లేక్ వేవ్ రెసిడెన్సీలో నివాసం ముంటున్నాడని గుర్తించారు.

గతంలో అతనిపై చాలా కేసులు ఉన్నట్లు కూడా పోలీసులు గుర్తించారు. వెంటనే వినోద్ దేవాన్‌ను అరెస్టు చేసి కోర్టులో హాజరుపరిచారు. వృద్ధుడి వేధింపుల నుంచి తనకు విముక్తి కలిపించిన రాచకొండ షీటీమ్‌కు ఆ యువతి ధన్యవాదాలు తెలిపింది. రాచకొండ పరిధిలోని మహిళలకు ఏదైనా సమస్య ఉంటే తమ వాట్సాప్ నంబర్ 9490617111కి సంప్రదించాలని కమిషనర్ ఓ ప్రకటనలో వెల్లడించారు.