టీఆర్ఎస్‌లో చేరిన సీనియర్ నటుడు

బుల్లితెర నటుడు, హైకోర్టు అడ్వకేట్‌ జేఎల్‌. శ్రీనివాస్‌ శుక్రవారం టీఆర్ఎస్ పార్టీలో చేరారు. రాష్ట్ర మాజీ మంత్రి తుమ్మల నాగేశ్వరరావు పార్టీ కండువా కప్పి శ్రీనివాస్‌ను టీఆర్‌ఎస్‌ పార్టీలోకి ఆహ్వానించారు. అనంతరం సోమాజిగూడ ప్రెస్‌క్లబ్‌లో ఏర్పాటు చేసిన విలేకరుల సమావేశంలో శ్రీనివాస్ మాట్లాడారు. టీఆర్ఎస్ అధ్యక్షుడు, ఆపద్ధర్మ ముఖ్యమంత్రి కేసీఆర్ రాష్ట్ర అభివృద్ధి కోసం ఎన్నో పథకాలు ప్రవేశ పెట్టారని ఆయన కొనియాడారు. కేసీఆర్ పాలనకు ఆకర్షితుడినై తాను టీఆర్ఎస్‌లో చేరినట్లు శ్రీనివాస్ తెలిపారు.

ఖమ్మం జిల్లాకు చెందిన తాను గత 30 ఏళ్లుగా సుమారు 200 పైగా సినిమాలు, పలు సీరియల్స్‌లో విభిన్న పాత్రలు పోషించినట్లు చెప్పారు. ముందస్తు అసెంబ్లీ ఎన్నికల్లో టీఆర్ఎస్ విజయం సాధిస్తుందని ధీమా వ్యక్తం చేశారు. టీఆర్‌ఎస్‌ పార్టీ తరఫున అన్ని నియోజకవర్గాల్లో టీవీ సీరియల్ కళాకారుల బృందంతో ప్రచారం నిర్వహించనున్నట్లు వెల్లడించారు. గత ఆరు దశాబ్దాలలో ఇతర ప్రభుత్వాలు చేయలేని పనులను టీఆర్‌ఎస్‌ పార్టీ నాలుగున్నరేళ్లలో చేసి చూపించిందని అభిప్రాయపడ్డారు.