ఎమ్మెల్సీ పదవులకు పయ్యావుల, కోలగట్ల రాజీనామా.. అదే బాటలో మరికొందరు

ఏపీలో రాజీనామాల పర్వం మొదలయ్యింది. వైసీపీ ప్రభుత్వం అధికారంలోకి రావడంతో.. రాజీనామాల పరంపర కొనసాగుతోంది. నామినేటెడ్ పదవుల నుంచి ఎమ్మెల్సీ పదవుల వరకు నేతలు గుడ్ బై చెబుతున్నారు. ఎమ్మెల్సీలగా కొనసాగుతూ ఎన్నికల్లో ఎమ్మెల్యేలుగా గెలిచినవారు పాత పదవుల్ని వదిలేస్తున్నారు. వరుసగా రాజీనామాలు చేస్తున్నారు.

టీడీపీ ఎమ్మెల్సీ పయ్యావుల కేశవ్ తన ఎమ్మెల్సీ పదవికి రాజీనామా చేశారు. ఎన్నికల్లో అనంతపురం జిల్లా ఉరవకొండ నుంచి పోటీ చేసిన పయ్యావుల వైసీపీ అభ్యర్థి విశ్వేశ్వర్ రెడ్డిపై గెలుపొందారు. దీంతో తన ఎమ్మెల్సీ పదవిని వదులుకున్నారు. మంగళవారం రాజీనామా లేఖను కౌన్సిల్ ఛైర్మన్‌కు సమర్పించగా.. వెంటనే ఆమోదం పొందింది. పయ్యావుల స్థానిక సంస్థల నుంచి ఎమ్మెల్సీగా గెలిచారు.

వైసీపీ ఎమ్మెల్సీ కోలగట్ల వీరభద్రస్వామి కూడా ఎమ్మెల్సీ పదవిని వదులుకున్నారు. విజయనగరం అసెంబ్లీ నియోజకవర్గం నుంచి ఎమ్మెల్యేగా గెలుపొందిన ఆయన.. ఎమ్మెల్సీ పదవికి రాజీనామా చేశారు. గురువారం మధ్యాహ్నం శాసనమండలి ఇంచార్జ్‌ కార్యదర్శికి రాజీనామా లేఖను సమర్పించారు. విజయనగరం నుంచి పోటీచేసిన కోలగట్ల.. టీడీపీ అభ్యర్థి అదితి గజపతిరాజుపై గెలుపొందారు.

ఇక ప్రకాశం జిల్లాకు చెందిన మాగుంట శ్రీనివాసులు రెడ్డి కూడా పదవికి గతంలోనే రాజీనామా చేశారు. టీడీపీ నుంచి వైసీపీలో చేరే ముందు తన పదవికి గుడ్ బై చెప్పారు. ఎన్నికల్లో ఒంగోలు ఎంపీగా గెలిచారు. ఈ రాజీనామాను గతంలోనే ఆమోదించారు. ప్రకాశం జిల్లా స్థానిక సంస్థల తరపున మాగుంట శ్రీనివాసులురెడ్డి ఎమ్మెల్సీగా ఎన్నికయ్యారు.

మరో ఇద్దరు ఎమ్మెల్సీలు కూడా రాజీనామాకు సిద్ధమవుతున్నారు. వీరు కూడా ఈ నెల 12లోపు రాజీనామా చేయబోతున్నారుట. వైసీపీ నుంచి ఎమ్మెల్సీగా ఉన్న ఆళ్ల నాని పశ్చిమ గోదావరి జిల్లా ఏలూరు అసెంబ్లీ నియోజకవర్గం నుంచి ఎన్నికల్లో పోటీ చేసి గెలిచారు. దీంతో ఆయన కూడా ఎమ్మెల్సీ పదవికి రాజీనామా చేయాల్సి ఉంటుంది.

అలాగే ప్రకాశం జిల్లా టీడీపీ సీనియ్ నేత కరణం బలరాం ఎమ్మెల్సీగా ఉన్నారు. ఎన్నికల్లో చీరాల నియోజకవర్గం నుంచి పోటీ చేసి.. వైసీపీ అభ్యర్థి ఆమంచిపై ఘన విజయం సాధించారు. దీంతో ఆయన కూడా ఎమ్మెల్సీ పదవికి రాజీనామా చేశారు. ఈ రాజీనామాకు ఆమోదం లభించింది. ఎమ్మెల్యేలుగా గెలిచిన వారంతా ఎమ్మెల్సీలుగా రాజీనామా చేస్తే.. మొత్తం ఐదు స్థానాలకు ఖాళీలు ఏర్పడతాయి.