అమీర్‌పేట్ టు మియాపూర్.. అమేజింగ్ జర్నీ!

హైదరాబాద్‌లో ట్రాఫిక్ గురించి ప్రత్యేకంగా చెప్పనక్కర్లేదు. అమీర్‌పేట నుంచి మియాపూర్ వెళ్లాలంటే తక్కువలో తక్కవ 45 నిమిషాలు పడుతుంది. ఒకవేళ పీక్ టైమ్‌లో అయితే గంట కూడా పట్టొచ్చు. కానీ బుధవారం నుంచి నగర వాసులకు అందుబాటులోకి వచ్చిన మెట్రో రైలు మాత్రం కేవలం 15 నిమిషాల్లోనే అమీర్‌పేట నుంచి మియాపూర్‌కు తీసుకుపోతోంది. ఎలాంటి అసౌకర్యానికి తావు లేకుండా హాయిగా ఏసీ రైలులో అతి తక్కువ సమయంలో గమ్యాన్ని చేరుకునే అవకాశం మెట్రోతో దక్కుతోంది.

మెట్రో స్టేషన్‌లలో సిబ్బంది సైతం ప్రయాణికులకు ఎంతగానో సహకరిస్తున్నారు. తొలిసారి మెట్రోలో ప్రయాణం చేయడానికి వచ్చినవారికి కూడా ఎలాంటి అసౌకర్యం లేకుండా వారు సూచనలు ఇస్తున్నారు. టోకెన్లు, స్మార్ట్‌కార్డలను ఎలా ఉపయోగించాలో చెబుతున్నారు. మెట్రో రైలులో కూడా కంప్యూటరైజ్డ్ ఎనౌన్స్‌మెంట్ ప్రయాణికులకు ఎంతగానో ఉపయోగపడుతోంది. రాబోయే స్టేషన్, ఎటువైపు డోర్లు తెరుచుకుంటాయి వంటి సమాచారాన్ని రైలులో స్పీకర్ల ద్వారా ప్రయాణికులు వినొచ్చు. రైలు లోపల భాగాన్ని కూడా ఎంతో అందంగా తీర్చిదిద్దారు. మొత్తానికి అమీర్‌పేట నుంచి మియాపూర్ వరకు మెట్రో ప్రయాణం అమేజింగ్..!