పవన్‌కు అమిత్ షా ఇచ్చిన ఆఫర్ ఇదే!

ఒంగోలు, నెల్లూరు జిల్లాల జనసేన కార్యకర్తల సమావేశంలో మాట్లాడిన పవన్ కల్యాణ్ ఆసక్తికర వ్యాఖ్యలు చేశారు. ప్రత్యేక హోదా కోసం పోరాటానికి తాను సిద్ధమని, మీరు సిద్ధంగా ఉన్నారా..? అని అభిమానుల్ని, రాష్ట్ర, ప్రభుత్వాన్ని, ప్రతిపక్షాన్ని ప్రశ్నించారు. ప్రభుత్వాలకు బాధ్యత ఉండాలి, పార్లమెంట్ సాక్షిగా ఇచ్చిన మాట నిలబెట్టుకోవాలని సూచించారు. అందరం కోరుకుంటూనే, పోరాడితేనే ప్రత్యేక హోదా వస్తుందన్నారు. నరేంద్ర మోదీ ప్రభుత్వం ఆధార్ కావాలని అడుగుతోంది.. మనం ఇవ్వకపోతే..? కాబట్టి ప్రభుత్వాలు బాధ్యతాయుతంగా ఉండాలన్నారు.

ఎన్నికలు ముగిసిన ఆరు నెలల తర్వాత అమిత్ షా తనను కలిశారని పవన్ కల్యాణ్ తెలిపారు. భవిష్యత్తు జాతీయ పార్టీలదేనని, కాబట్టి జనసేనను బీజేపీలో విలీనం చేయాలని సూచించారని చెప్పారు. కానీ సున్నితంగా తోసి పుచ్చానని చెప్పారు. జాతీయ పార్టీలే సక్రమంగా పని చేస్తే అసలు ప్రాంతీయ పార్టీలు ఎందుకు ఏర్పాటు అవుతాయని ప్రశ్నించారు. నన్ను నమ్ముకొని మీరు ఓటేశారు. మీ ఆశలను నేను వమ్ము చేయనని పవన్ తెలిపారు. బీజేపీ కూడా ఒకప్పుడు ఒకంట్రెండు స్థానాలతోనే ప్రస్థానం ఆరంభించిన విషయాన్ని గుర్తుంచుకోవాలన్నారు.

నాకు రాజకీయాల వల్ల పిడికెడు ఉపయోగం కూడా లేదు. ఓడిపోతానేమో కానీ.. దెబ్బకొట్టే వెళ్తానని పవన్ చెప్పారు. ప్రభుత్వాలైనా, ప్రతిపక్షాలైనా.. బాధ్యతాయుతంగా వ్యవహరించకపోతే.. ప్రజా ఉద్యమాలు వస్తాయని హెచ్చరించారు.