​వారు మాట్లాడుతుంటే.. వైకాపాకు ఒళ్లు మండుతోంది..!

ఏపీ అసెంబ్లీ సమావేశాలు యథావిధిగా రసాభసగానే కొనసాగుతున్నాయి. మంగళవారం కూడా సభలో ఇలాంటి సన్నివేశాలే చోటు చేసుకున్నాయి. పాలక, ప్రతిపక్షాల మధ్య ఉద్రిక్తవాతావరణమే కొనసాగుతోంది. సభలో టెన్త్ క్లాస్ పబ్లిక్ కొశ్చన్ పేపర్ల లీకేజీ అంశం పై చర్చ చేపట్టాలని ప్రతిపక్ష వైకాపా డిమాండ్ చేయగా, అందుకు సంబంధించి వాయిదా తీర్మానాన్ని కోరగా.. స్పీకర్ అందుకు సమ్మతించలేదు. దీంతో ప్రతిపక్ష పార్టీ ఆందోళనకు దిగింది. నినాదాలతో హెరెత్తించింది. ప్రత్యేకించి లీకేజీ వ్యవహారంలో నారాయణ విద్యా సంస్థల పేర్లు వినిపించడం, ఆ విద్యా సంస్థల యజమాని నారాయణ తెలుగుదేశం ప్రభుత్వంలో మంత్రి కావడంతో.. ఈ వ్యవహారంపై రాజకీయ కోణం ప్రస్ఫుటమైంది.

ప్రతిపక్ష సభ్యుల నినాదాల నడుమ.. అధికార పార్టీ టెన్త్ పేపర్ల లీకేజీ జరగలేదని స్పష్టం చేసింది. లీకైనా పేపర్లు వాట్సాప్ లో ఉన్నాయని అంటున్నారని, అయితే అవన్నీ పరీక్ష అయిపోయిన తర్వాత బయటకు వచ్చాయని వివరణ ఇచ్చింది. అయితే ప్రభుత్వ వివరణతో ప్రతిపక్షం తగ్గలేదు. లీకైందని అధికారుల నివేదికలే చెబుతున్నాయని కొన్ని పత్రాలను ప్రదర్శించారు వైకాపా సభ్యులు.

ఈ క్రమంలో కొంతమంది వైకాపా ఫిరాయింపు ఎమ్మెల్యేలు మైకందుకోవడంతో వైకాపా ఎమ్మెల్యేలు మరింత రెచ్చిపోయారు. తమ పార్టీ తరపున గెలిచి, తెలుగుదేశంలో చేరిన వారిపై అనర్హత వేటు వేయాలని తాము ఫిర్యాదులు చేసినా పట్టించుకోని స్పీకర్ వారికి సభలో మాట్లాడే అవకాశం ఇవ్వడం ఏమిటి? అంటూ వైకాపా సభ్యులు నినాదాలు చేశారు. ఫిరాయింపు ఎమ్మెల్యే కలమట వెంకటరమణ మాట్లాడుతుండగా.. వైకాపా ఎమ్మెల్యేలు ఆయన వెనుక చేరారు. ఫ్లకార్డులను చూపిస్తూ.. నినాదాలు చేశారు.

ఈ సమావేశాల్లో పలువురు వైకాపా ఫిరాయింపు ఎమ్మెల్యేలు సభలో మాట్లాడారు.. వారంతా వైఎస్సార్ కాంగ్రెస్ పార్టీ అధినేత జగన్ పై తీవ్రమైన విమర్శలు చేశారు. తమ పార్టీ తరపున గెలిచి, ఫిరాయించి.. తమ పార్టీ అధినేతపై విమర్శలు చేస్తూ ఉండటంతో వైకాపా ఎమ్మెల్యేలు అసహనంతో ఊగిపోయారు.