యాప్నగరం

అమ్మానాన్న ఆశయాలను నెరవేరుస్తా: అఖిలప్రియ

అమ్మానాన్న ఇచ్చిన ధైర్యంతో ప్రజా సమస్యలపై పోరాటం చేస్తాననీ, వారి ఆశయాలను నెరవేర్చి వాళ్ల ఆత్మలకు శాంతి కలిగేలా చేస్తానని అఖిలప్రియ పేర్కొన్నారు.

TNN 14 Mar 2017, 1:33 pm
‘నా తండ్రి చివరి కోరిక తీరే వరకు, ఆయన ఆశయాలు నెరవేరే వరకు ఏడవకూడదని నిర్ణయించుకున్నా’ అని భూమా నాగిరెడ్డి కుమార్తె, ఆళ్లగడ్డ ఎమ్మెల్యే అఖిలప్రియ అన్నారు. ఆంధ్రప్రదేశ్ అసెంబ్లీలో భూమా నాగిరెడ్డి మృతికి సంతాపం తెలుపుతూ ప్రవేశపెట్టిన తీర్మానం సందర్భంగా ఆమె అత్యంత ధైర్యంగా ప్రసంగించి, అందరినీ ఆకట్టుకున్నారు. ‘ప్రజల కోసం అహర్నిశలు పాటుపడిన నా తండ్రి గురించి శాసనభలో గొప్పగా చెబుతుంటే సంతోషంగా ఉంది. ఇప్పుడిప్పుడే రాజకీయాల్లో ఎదుగుతున్నా. ఈ క్రమంలో వరసగా తల్లిని, తండ్రిని కోల్పోవడం బాధ కలిగిస్తోంది. నంద్యాలలో పేదలకు 10 వేల ఇళ్ల నిర్మాణం పూర్తి చేయడం మా నాన్న ఆశయం. అవి పూర్తై.. ప్రతి ఇంటికీ తాగునీటి సరఫరా అయ్యాకే నా తండ్రిని తలుచుకుని ఏడుస్తా. అప్పటివరకూ బాధను గుండెల్లోనే దిగమింగుకుంటా’ అని ఆమె పేర్కొన్నారు.
Samayam Telugu ap assembly tributes bhuma nagi reddy
అమ్మానాన్న ఆశయాలను నెరవేరుస్తా: అఖిలప్రియ


తన తండ్రి చిన్ననాటి నుంచే చాలా కష్టాలు అనుభవించారని ఆమె తెలిపారు. ఆయన.. తన తండ్రి, అన్నదమ్ముల మరణాన్ని తట్టుకుని రాజకీయాల్లో ఉన్నత స్థాయికి ఎదిగారని చెప్పారు. తమతో పాటు పెదనాన్న పిల్లలను కూడా పెంచి, వివాహాలు జరిపించారని తెలిపారు. అమ్మ మృతితో ఆయన అంతులేని శోకంలో మునిగిపోయారనీ, ఇంత కాలం మా కోసమే బతికారని వివరించారు. తన తల్లిదండ్రులిద్దరూ ‘మేడ్ ఫర్ ఈచ్ అదర్’ అని ఆమె పేర్కొన్నారు. అనారోగ్యం కారణంగా ప్రయాణాలు చేయొద్దని డాక్టర్లు చెప్పారనీ, తాను వారించినా వినకుండా చనిపోయే ముందు వరకూ తిరుగుతూనే ఉన్నారని అఖిలప్రియ తెలిపారు. ఆయన.. తన చివరి కోరికను సీఎంకు స్వయంగా చెప్పాలనే తపనతోనే విజయవాడ వెళ్లి ఉంటారని ఆమె అన్నారు.

‘నాన్నకు గుండెపోటు వచ్చిన వెంటనే.. ముఖ్యమంత్రి చంద్రబాబు, లోకేశ్‌కు ఫోన్‌ చేశా. సీఎం వెంటనే స్పందించారు. ఆయణ్ని హైదరాబాద్‌కు తరలించేందుకు ఎయిర్‌ అంబులెన్స్‌ సిద్ధం చేశారు. కానీ, దురదృష్టవశాత్తూ అప్పటికే ఆయన ప్రాణం వదిలారు’ అని ఆమె తెలిపారు. ‘జగన్ జైల్లో ఉన్నప్పుడు అమ్మ.. మమ్మల్ని కూడా పట్టించుకోకుండా వైకాపా వ్యవహారాల్లో చురుగ్గా పాల్గొన్నారు. నాన్న కూడా జగన్‌కు అండగా నిలిచారు.. అలాంటి వ్యక్తి చనిపోతే కనీసం సభలో సంతాపం ప్రకటించడానికి కూడా వారు రాకపోవడం బాధగా ఉంది’ అని అఖిలప్రియ వ్యాఖ్యానించారు. శాసనసభలో తన తండ్రి గురించి ఇలాంటి పరిస్థితుల్లో మాట్లాడాల్సి వస్తుందని ఎప్పుడూ తాను అనుకోలేదని గద్గరస్వరంతో చెప్పారు. అమ్మానాన్న ఇచ్చిన ధైర్యంతో ప్రజా సమస్యలపై పోరాటం చేస్తాననీ, వారి ఆశయాలను నెరవేర్చి వాళ్ల ఆత్మలకు శాంతి కలిగేలా చేస్తానని అఖిలప్రియ పేర్కొన్నారు.

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.