పచ్చ చొక్కాలకే పథకాలు.. రెండు, మూడు నెలల్లో బాబు పదవి ఊడటం ఖాయం : కన్నా

ఆంధ్రప్రదేశ్‌లో అవినీతి రాజ్యమేలుతోందన్నారు బీజేపీ రాష్ట్ర అధ్యక్షుడు కన్నా లక్ష్మీనారాయణ. మరో రెండు, మూడు నెలల్లో చంద్రబాబు పదవి ఊడటం ఖాయమంటూ జోస్యం చెప్పారు. విజయవాడలో జరిగిన పార్టీ కార్యక్రమానికి హాజరైన కన్నా.. చంద్రబాబు, మంత్రి లోకేష్‌లపై విమర్శలు కురిపించారు. రాష్ట్రాన్ని బాబు లోకేష్‌లు దోచుకుంటున్నారని ఆరోపించారు కన్నా. రాష్ట్రంలో పచ్చ కండువా వేసుకున్నవారికే పథకాలు, నిధులు అందుతున్నాయని విమర్శించారు. రాజధాని పేరుతో రైతుల నుంచి భూములు తీసుకొని.. భూ దందా చేస్తున్నారని ఆరోపించారు.

కేంద్రం అమరావతి నిర్మాణానికి రూ.2,500కోట్లు విడుదల చేస్తే.. అమరావతిలో నాలుగు భవనాలు కూడా కట్టలేకపోయారని ఎద్దేవా చేశారు కన్నా. రాజధాని నిర్మాణం కోసం సేకరించిన విరాళాలు ఏమయ్యాయో చెప్పాలని ప్రశ్నించారు. చంద్రబాబుది అన్నం తిన్న చేతినే నరికే పద్దతని.. కేంద్రాన్ని కూడా అలాగే మోసం చేశారని విమర్శించారు. మరో రెండు, మూడు నెలల్లో సీఎం చంద్రబాబు పదవి ఊడటం ఖాయమని.. రాబోయే ఎన్నికల్లో ప్రజలు తగిన బుద్ధి చెబుతారన్నారు కన్నా.