నేడే ఏపీ బడ్జెట్.. యనమల అద్భుతహ అనిపించేనా!

ఏపీ ప్రభుత్వం రాష్ట్ర విభజన తర్వాత సొంత గడ్డపై తొలి బడ్జెట్‌ను బుధవారం అసెంబ్లీకి సమర్పించనున్నారు. రాష్ట్ర బడ్జెట్‌ 2017-18ని ఆర్థిక మంత్రి యనమల రామకృష్ణుడు బుధవారం ఉదయం శాసనసభలో ప్రవేశపెడతారు. అదే సమయంలో శాసనమండలికి పట్టణాభివృద్ధి శాఖ మంత్రి నారాయణ బడ్జెట్‌ను సమర్పిస్తారు.

సంక్షేమం, అభివృద్ధి సమ్మిళితంగా బడ్జెట్‌ ఉంటుందని ప్రభుత్వం చెబుతోంది. గత రెండేళ్లలో అమలుచేసిన సంక్షేమపథకాలు, కార్యక్రమాలకు తోడు ఈ ఏడాది మరికొన్నిటికి బడ్జెట్‌లో చోటు లభిస్తోంది. టీడీపీ ఎన్నికలహామీల్లో మిగిలిపోయిన ప్రధానాంశాలకు ఈసారి బడ్జెట్‌లో చోటుకల్పించారు.

వాటిలో ప్రధానంగా నిరుద్యోగ భృతి, మా ఇంటి మహాలక్ష్మి, ఎన్టీఆర్‌ సుజల, అగ్రకులాల్లో ఆర్థికంగా వెనుకబడినవారికి సాయం, ఈబీసీల కోసం ప్రత్యేక కార్పొరేషన్‌ ఏర్పాటు, చిన్న తరహా పరిశ్రమలకోసం అథారిటీ వంటి మరికొన్ని కార్యక్రమాలకు పెద్ద పీట వేయనున్నారు. దానికితోడు బీసీల సంక్షేమానికి అదనపు నిధులు కేటాయించనున్నారు. కాగా రాష్ట్ర ప్రభుత్వ శాఖలన్నీ కలిపి ఏకంగా రూ. 2,29,842 కోట్లకు డిమాండ్లు సమర్పించగా.. వాటిని పరిశీలించిన ఆర్థికశాఖ రూ.1,55,896 కోట్లకు తగ్గించింది.