పునర్వ్యవస్థీక‘రణం’: సీఎం సాబ్.. వీరికి చోటేది?

ఎప్పుడెప్పుడా అని ఎదురు చూస్తోన్న ఏపీ కేబినెట్ పునర్వ్యవస్థీకరణ పూర్తయ్యింది. కొత్త మంత్రుల కొలువుదీరారు. పాత అమాత్యులు కొందరు ఉద్వాసనకు గురయ్యారు. పదవి వచ్చినవారు ఆనందం వ్యక్తం చేస్తుండగా.. రాని వారు అలకల బూనుతున్నారు. రాజీనామా లేఖలతో బెదిరింపులకు దిగుతున్నారు. మరి కొందరేమో మా వైరి వర్గానికి ఎలా ఇస్తారంటూ ప్రశ్నిస్తున్నారు.

చంద్రబాబు మంత్రి వర్గంలో 26 మంది అమాత్యులు ఉండగా.. సామాజిక వర్గాల వారీగా పరిశీలిస్తే.. ఓసీలు 17, బీసీలు, ఎస్సీలు కలిపి 9 మంది. ఎస్టీలు, మైనార్టీలకు మాత్రం ప్రాధాన్యం దక్కలేదు. గణనీయ సంఖ్యలోనే ఉన్నప్పటికీ.. తమ వర్గం నుంచి ఎవరికీ మంత్రి పదవి ఇవ్వలేదంటూ ముస్లింలు ఆగ్రహం వ్యక్తం చేస్తున్నారు.

వచ్చే ఎన్నికలను దృష్టిలో ఉంచుకొని సామాజిక వర్గాల సమతూకం పాటించేందుకే ముఖ్యమంత్రి ప్రయత్నించారు. అందులో భాగంగానే బొజ్జల లాంటి సీనియర్ నేతల మంత్రి పదవులు పోయాయి. కానీ ఎస్టీలు, ముస్లింలను ఏ మాత్రం పట్టించుకోకపోవడం మాత్రం ఆశ్చర్యాన్ని కలిగిస్తోంది. ఆశావహులు ఎక్కువ మంది ఉండటం, మంత్రి వర్గంలో బెర్తులు తక్కువగా ఉండటంతో సీఎం కూడా ఏం చేయలేక చేతులెత్తేశారు.

మంత్రివర్గ పునర్వ్యవస్థీకరణ తర్వాత అసంతృప్తులు, విమర్శించే వారు ఎక్కువయ్యారు. చంద్రబాబు ఏదోలా కానిచ్చేశారు. ఇప్పుడు కేసీఆర్ వంతు. ఆయనేం చేస్తారో. ఎందుకంటే తెలంగాణ కేబినెట్‌లో ఇప్పటి వరకూ మహిళలకు చోటు దక్కలేదు.