సీఎం గారి అబ్బాయి స్పీడ్ తగ్గిందట..!

అతను పార్టీ జాతీయ కార్యదర్శి, సీఎం గారి పుత్రరత్నం, అధికార పార్టీలో కీలక సభ్యుడిగా ఉంటూ క్రియాశీలక వ్యవహారాలన్నీ అతనే చూస్తాడు. మంత్రులు సైతం పార్టీ పనులపై అతన్నే సంప్రదిస్తారు. తన తండ్రి ఆదేశించిన దాన్ని వెంటనే అమలు చేస్తాడు. గత ఏడాది 50 రోజుల్లో 55 లక్షల పార్టీ సభ్యత్వాలను నమోదు చేసి రికార్డ్ క్రియేట్ చేశాడు ఆ తనయుడు. కాని అతనిలో ఇప్పుడు స్పీడ్ తగ్గిదట.. ఇంతకు ముందులా పనిచేయడం లేదట.. ఈ మాటలు అన్నది ఎవరో కాదు ఏపి సీఎం చంద్రబాబు.. లోకేశ్ బాబుని ఉద్దేశించి. వివరాల్లోకి వెళ్తే....
విజయవాడలో మొన్న క్యాబినేట్ భేటీకి ముందు పార్టీ సయన్వయ కమిటీ సమావేశాన్ని ఏర్పాటుచేశారు. ఈ సమావేశంలోనే ఆసక్తి కరమైన వ్యాఖ్యలు చేశారు చంద్రబాబు. తొలిత నగరపాలక, పురపాలక సంఘాల ఎన్నికలను డిసెంబర్‌ నెలాఖరులో జరపాలని తొలుత భావించినప్పటికీ, సంక్రాంతి పండుగ గడిచాక, అంటే జనవరి 20వ తేదీ తర్వాత నిర్వహించాలని నేతలందరూ కోరారు. ఈ ప్రతిపాదనకు ముఖ్యమంత్రి అంగీకరించారు. కేంద్రం ప్రకటించిన ప్యాకేజీ ప్రయోజనాలను పార్టీ యంత్రాంగం ప్రజల్లోకి తీసుకువెళ్లాలని సీఎం కార్యకర్తలను కోరారు. ఈ తరుణంలోనే చంద్రబాబు స్పందిస్తూ పార్టీ నేతలు తమ పనితీరులో వేగం పెంచుకోవాలని సూచించారు. "కొంతమంది నేతలు చంద్రబాబే అన్నీ చూసుకుంటారులే అనే భావనలో ఉన్నారు. ఆ ఆలోచన కరెక్ట్ కాదు. రాజకీయాల్లో మనం ప్రజలకు జవాబుదారీగా వుండాలి. 80 శాతం ప్రజల్లో సంతృప్తివుండాలి. అందరూ వేగంగా పనిచేయాలి. ‘లోకేశ్‌లో కూడా స్పీడు తగ్గింది. గతంలో ఏదైనా పనిచెబితే వెంటనే చేసేవాడు. ఇప్పుడు ఆ స్పీడు తగ్గింది. స్పీడు పెరగాలి..'' అంటూ ముఖ్యమంత్రి చేసిన వ్యాఖ్యలు సమావేశంలో కాసేపు సంచలనం రేకెత్తించాయి. "నేను నా కుమారుడినైనా లెక్కచేయను. ప్రజల్లో 80 శాతం సంతృప్తి వచ్చేవరకు నేను ఎవరినీ నిద్రపోనీయను, నేను నిద్రపోను. అందరినీ పరుగెత్తిస్తూనే వుంటాను..'' అని చంద్రబాబు ప్రతిన పూనారు. వెంటనే  కొంతమంది నేతలు "పార్టీ పనులపై మేమంతా లోకేశ్‌బాబు వద్దకే వెళుతున్నాం. ఆయన వెంటనే పరిష్కరిస్తున్నారు.." అని బాబుతో చెప్పారు. అయినా సీఎం గారి అబ్బాయిని అంత మాట అనే ధైర్యం చంద్రబాబుకి తప్ప ఎవరికి ఉంటుంది. చూద్దాం.... తండ్రి మాటలకి లోకేశ్ స్పీడ్ ఏ రేంజ్ లో ఉంటుందో.