వరద ప్రభావిత ప్రాంతాలపై సీఎం చంద్రబాబు ఏరియల్ సర్వే

ఉభయగోదావరి జిల్లాల్లో పర్యటించారు ఏపీ సీఎం చంద్రబాబు. ఉదయం రాజమహేంద్రవరం ఎయిర్‌పోర్టుకు చేరుకున్న సీఎం.. హెలికాప్టర్ ద్వారా వరద ప్రభావిత ప్రాంతాల్లో ఏరియల్ సర్వే నిర్వహించారు. తర్వాత రాజమహేంద్రవరంలో అధికారులతో సమీక్ష చేశారు. వరద, పంటనష్టంపై ఆరా తీసి.. సహాయక చర్యలపై వారితో చర్చించారు. ముఖ్యంగా ఉభయగోదావరి జిల్లాల్లో వర్షాలు, వరదల వల్ల ఏర్పడిన నష్టాన్ని అంచనా వేయాలని అధికారులు సూచించారు.

ఉభయగోదావరి జిల్లాల్లో వరదలతో తీవ్రంగా నష్టపోయాయన్నారు సీఎం చంద్రబాబు. తూర్పుగోదావరి జిల్లాలోని 45 గ్రామాలపై వరద ప్రభావం ఎక్కువగా ఉందని.. బాధితుల కోసం 15కుపైగా పునరావాస కేంద్రాలను ఏర్పాటు చేశామన్నారు. పశ్చిమగోదావరి జిల్లా విషయానికొస్తే.. ఎర్రకాలువతో ఎక్కువ నష్టంవాటిల్లిందన్నారు. వరద నీటితో చాలా గ్రామాలకు రాకపోకలు కూడా నిలిచిపోయాయన్నారు. అలాగే ఎర్రకాలువ ముంపు సమస్యకు కూడా శాశ్వత పరిష్కారం చూపేందుకు ప్రయత్నిస్తామని చెప్పారు.

ఉభయ గోదావరి జిల్లాల్లో కలిపి వరదల వల్ల రూ.600కోట్ల నష్టం జరిగిందని అంచనా వేస్తున్నామన్నారు సీఎం. కాజ్‌వేల పున:నిర్మాణానికి.. వరదలతో దెబ్బతిన్న రోడ్లకు నిధులు కేటాయిస్తామన్నారు. అలాగే పంటనష్టానికి పరిహారం చెల్లిస్తామన్నారు. కోస్తాను వరదలు ముంచెత్తుతుంటే.. రాయలసీమను కరువు వెంటాడుతోందన్నారు చంద్రబాబు. రాష్ట్రంలో 57 ప్రధాన ప్రాజెక్టులు చేపట్టామని.. వాటిలో 16 పూర్తయ్యాయన్నారు.