Chandrababu Naidu: కేసీఆర్ గారూ కంగ్రాట్స్.. బాబు ట్వీట్

తెలంగాణ ఎన్నికల్లో ఘన విజయం సాధించిన కేసీఆర్‌కు ఏపీ ముఖ్యమంత్రి చంద్రబాబు నాయుడు కంగ్రాట్స్ తెలిపారు. ప్రజా తీర్పును గౌరవిస్తున్నామని చంద్రబాబు ఈ సందర్భంగా తెలిపారు. టీఆర్ఎస్‌కు వ్యతిరేకంగా మహాకూటమి ఏర్పాటులో కీలకంగా వ్యవహరించిన చంద్రబాబు.. తెలంగాణ ఎన్నికల్లోనూ ప్రచారం చేసిన సంగతి తెలిసిందే. ఎన్నికల్లో కూటమి దారుణంగా పరాభవం చెందగా.. తెలుగు దేశం పార్టీ 13 స్థానాల్లో పోటీ చేసినప్పటికీ.. ఒక్క స్థానానికే (మంగళవారం మధ్యాహ్నం వరకు) పరిమితమైంది. టీడీపీకి బలమైన ఓటు బ్యాంకు ఉన్న హైదరాబాద్ పరిసర ప్రాంతాల్లోనూ ఈ దఫా నిరాశాజనకమైన ఫలితాలే వచ్చాయి.

మధ్యప్రదేశ్, ఛత్తీస్‌గఢ్, రాజస్థాన్, తెలంగాణ, మిజోరాం అసెంబ్లీ ఎన్నికల్లో విజయం సాధించిన పార్టీలు, అభ్యర్థులకు కూడా చంద్రబాబు అభినందనలు తెలిపారు. గడిచిన ఐదేళ్లలో బీజేపీ చేసిందేం లేదని గ్రహించిన ప్రత్యామ్నాయం వైపు మళ్లుతున్నారని బాబు తెలిపారు. బీజేపీకి వ్యతిరేకంగా పోరాటంలో ప్రజలు తమ పక్షాన ఉన్నారని చంద్రబాబు చెప్పారు. బీజేపీకి బలమైన ప్రత్యామ్నాయం ఏర్పాటు కోసం ఐదు రాష్ట్రాల ఎన్నికల ఫలితాలు తోడ్పడతాయన్నారు.

కేసీఆర్‌కు చంద్రబాబు అభినందనలు తెలపడం పట్ల నెటిజన్లు సెటైర్లు వేస్తున్నారు. ‘సార్ మరోసారి యూటర్న్ తీసుకొని కేసీఆర్‌తో చేతులు కలపడానికి ప్రయత్నించండ’ని ఒకరు ఎద్దేవా చేశారు.

మీరు ప్రచారం చేసిన ఏ ఒక్క దగ్గర కూడా కూటమి గెలవలేందంట కదా సార్.. అని మరో నెటిజన్ సరదాగా పంచ్‌లు విసిరారు. మీ వల్లే టీఆర్ఎస్ విజయం తేలికైందంటూ కొందరు నెటిజన్లు సెటైర్లు విసిరారు.