కులాంతర వివాహాలు జరగాలి: ఏపీ అసెంబ్లీలో చంద్రబాబు

మిర్యాలగూడలో జరిగిన పరువ హత్యపై ఏపీ సీఎం చంద్రబాబు నాయుడు ఆవేదన వ్యక్తం చేశారు. తక్కువ కులానికి చెందిన వాడనే కారణంతో మిర్యాల గూడకు చెందిన ప్రణయ్ అనే యువకుడ్ని అత్యంత పాశవికంగా హత్య చేసిన ఘటనపై స్పందించిన చంద్రబాబు సోమవారం నాటి అసెంబ్లీ సమావేశంలో మాట్లాడుతూ.. కులాలకు అతీతంగా పెళ్లుళ్లు జరగాల్సిన అవసరం ఉందన్నారు.

Read Also: రేయ్ జంగిల్ ఫెలోస్.. ఇంకా కులం, పరువు హత్యలేంట్రా?: హీరో రామ్
ఈ సందర్భంగా అసెంబ్లీలో మాట్లాడుతూ.. ‘యువతీ యువకులు పెళ్లి చేసుకుని ఆనందంగా గడపాలని పెళ్లి కానుక పథకాన్ని ప్రవేశపెట్టాం. ఇందులో కులాంతర వివాహాలకు అధిక ప్రాధాన్యత ఇచ్చాం. ఈరోజు కులం, మతం, ప్రాంతాలపై కొన్ని మూడనమ్మకాలు ఉన్నాయి. అయితే కులం అనేది మనం సృష్టించుకున్నదే.. భవిష్యత్‌లో వీలైనన్ని కులాంతర వివాహాలు జరగాలి.

Read Also: కుల పిచ్చోళ్లూ.. సిగ్గుపడండి: మంచు మనోజ్
తెలంగాణలో జరిగిన పరువుహత్య చాలా దారుణం. మిర్యాలగూడలో ప్రణయ్‌ అనే యువకుడ్ని తక్కువ కులం అనే కారణంతో అమ్మాయి తండ్రే చంపించారంటే సమాజంలో ఎన్ని మూడనమ్మకాలు, అహంకారం ఉందో అర్ధం చేసుకోవల్సిన అవసరం ఉంది. ఇలాంటి సాంప్రదాయం నుండి విముక్తి కలగాలి. అబ్బాయి అమ్మాయి ప్రేమించుకున్నప్పుడు.. ఒకర్నొకరు అర్ధం చేసుకుని ఒకటిగా ఉంటాం అన్నప్పుడు.. తల్లిదండ్రుల బాధ్యత ఏంటి అంటే.. వాళ్లను ఆశీర్వదించడం. లేకపోతే వాళ్లకు సహాయం చేయడం.. లేదంటే వాళ్లని అలా వదిలిపెట్టడం.. ఇదేమీ కాకుండా అంత దారుణంగా ప్రణయ్‌ని చంపించిన ఆ తండ్రి సాధించింది ఏమిటి? ఇలాంటి దుర్మార్గపు ఆలోచనల్ని నుండి బయటకు రావాలి. అహంకారం అనే గీత నుండి బయటకు రావాలి. ప్రస్తుత పరిస్థితులలో కుల అహంకారాన్ని విడిచిపెట్టాల్సిన అవసరం ఎంతైనా ఉందంటూ..’ అసెంబ్లీ సాక్షిగా ప్రణయ్ హత్యను ఖండించారు చంద్రబాబు.