ఎలా ఆడించాలో అలా ఆడిస్తున్నారు..పవన్‌పై బాబు విమర్శలు

పవన్‌ కళ్యాణ్‌పై విమర్శలు చేశారు చంద్రబాబు. తూర్పుగోదావరి జిల్లా పర్యటనలో జరిగిన బహిరంసభకు హాజరైన సీఎం... కాపుల రిజర్వేషన్ల అంశంపై మాట్లాడారు. దీన్ని ప్రస్తావిస్తూ... పవన్‌పై విమర్శలు చేశారు. మొన్నటి వరకు టీడీపీతో ఉన్న పవన్ కళ్యాణ్... ఇప్పుడు తమనే టార్గెట్ చేస్తున్నారన్నారు. ఓ పద్దతి ప్రకారం ముందుకు వెళుతున్నానని... 40 ఏళ్ల రాజకీయ జీవితంలో సమస్యలపై పోరాడానే కాని... ఇలా ఏదో విధంగా బురద జల్లే ప్రయత్నం చేయలేదన్నారు. కొద్ది రోజులుగా జరుగుతున్న పరిణామాలను గమనిస్తున్నామని... ఇవన్నీ చూసినప్పుడు బాధ కలుగుతోందన్నారు బాబు.

కేంద్రం ఎన్ని విధాలుగా ఆడించాలో అన్ని విధాలుగా ఆడిస్తోందంటూ... ఎన్టీఆర్ సీఎంగా ఉన్నప్పటి పరిస్థితుల్ని చంద్రబాబు గుర్తు చేశారు. ఎన్టీఆర్ సీఎం అయ్యాక... ఆయన ఉంటే జాతీయ స్థాయిలో ఇబ్బంది వస్తుందని ప్రభుత్వాన్నే కాంగ్రెస్ భర్తరఫ్ చేసిందన్నారు. ప్రజలు కేంద్రంపై తిరుగుబాటు చేసి... మళ్లీ ఎన్టీఆర్‌ను సీఎంగా చేశారని... అది తెలుగవాళ్ల పౌరుషమని వ్యాఖ్యానించారు. వాళ్లంతా ఎన్ని విధాలుగా రావాలో... అన్ని విధాలుగా వస్తారని... సమస్యల్ని కూడా సృష్టిస్తారన్నారు. ప్రజలు అప్రమత్తంగా ఉండాల్సిన అవసరం ఉందన్నారు చంద్రబాబు.