Chandrababu US Tour: పెట్టుబడిలేని వ్యవసాయంపై నేడు న్యూయార్క్‌లో చంద్రబాబు ప్రసంగం

పెట్టుబడి అవసరంలేని ప్రకృతి సేద్యం(జెడ్‌బీఎన్ఎఫ్)పై ఆంధ్రప్రదేశ్ ముఖ్యమంత్రి నారా చంద్రబాబు నాయుడు నేడు(సెప్టెంబర్ 24న) న్యూయార్క్‌లో ప్రసంగించనున్నారు. న్యూయార్క్ నగరంలోని ఐక్యరాజ్యసమితి జనరల్ అసెంబ్లీలో నిర్వహిస్తోన్న ‘ఫైనాన్సింగ్ సస్టెయినబుల్ అగ్రికల్చర్: గ్లోబల్ ఛాలెంజస్ అండ్ ఆపర్చ్యునిటీస్’ అనే సదస్సులో జెడ్‌బీఎన్ఎఫ్‌పై చంద్రబాబు ప్రసంగిస్తారు. ఈ అంతర్జాతీయ సదస్సును యూఎన్ ఎన్విరాన్‌మెంట్ ప్రోగ్రామ్ నిర్వహిస్తోంది. దీనికి యూఎన్ ఉమెన్, బీఎన్‌పీ పరిబాస్ ఎస్ఏ, వరల్డ్ ఆగ్రోపారెస్ట్రీ సెంటర్, ఇతర పలు అంతర్జాతీయ సంస్థలు, ఫైనాన్షియల్ ఇన్‌స్టిట్యూషన్స్ సహకారం అందిస్తున్నాయి.

ఆంధ్రప్రదేశ్‌లో పెట్టుబడిలేని ప్రకృతి సేద్యం దిశగా రైతులను ప్రోత్సహించేందుకు ప్రభుత్వం తీసుకుంటున్న నిర్ణయాలను, చేపడుతున్న కార్యక్రమాల గురించి ఈ సదస్సులో చంద్రబాబు వివరించనున్నారు. వాస్తవానికి ఈ సదస్సులో ప్రసంగించాల్సిందిగా ఐక్యరాజ్య సమితి పర్యావరణ విభాగం ఎగ్జిక్యూటివ్ డైరెక్టర్ ఎరిక్ సోల్హియమ్ చంద్రబాబు నాయుడుకు లేఖ రాశారు. వ్యవసాయంలో ఆర్థిక సుస్థిరత, అంతర్జాతీయ సవాళ్లు, అవకాశాలపై యూఎన్‌ జనరల్‌ అసెంబ్లీలో జరిగే సదస్సులో పాల్గొని ప్రసంగించాలని చంద్రబాబును ఆహ్వానించారు.

ఏపీలో అమలు చేస్తున్న పెట్టుబడి రహిత ప్రకృతి సేద్యంను ఎరిక్ తన లేఖలో ప్రశంసించారు. పర్యావరణ, సామాజిక, ఆర్థిక రంగాలపై ప్రకృతి సేద్యం ప్రభావం గురించి ఆయన ప్రస్తావించారు. 2024 నాటికి ప్రకృతి సేద్యం దిశగా 60 లక్షల మంది రైతులను నడిపించేందుకు మీరు చేస్తున్న కృషి అభినందనీయమని, ఐరాస పర్యావరణ విభాగం మీకు అండగా నిలుస్తుందని ఎరిక్ తెలిపారు. కాగా, ఈ సదస్సులో ప్రసంగించడమే ప్రధానంగా చంద్రబాబు యూఎస్ పర్యటన వెళ్లారు. ఈనెల 27 వరకు చంద్రబాబు అమెరికా పర్యటన కొనసాగుతుంది.