జగ్జీవన్ రామ్ స్ఫూర్తితో పనిచేస్తాం: బాబు

మాజీ ఉప ప్రధాని, ప్రముఖ స్వాతంత్ర్య సమరయోధుడు బాబు జగ్జీవన్ రామ్ 110వ జయంతి ఉత్సవాలు ఆంధ్రప్రదేశ్ లో ఘనంగా జరిగాయి. గుంటూరులో ఉన్న జగ్జీవన్ విగ్రహానికి ఏపీ సీఎం చంద్రబాబు పూలమాల వేసి నివాళులు అర్పించారు. అంబేద్కర్, జగ్జీవన్ రామ్ కలలు గన్న సమసమాజం కోసం తమ ప్రభుత్వం శాయశక్తుల కృషి చేస్తోందని, ఆ మహానీయుల స్ఫూర్తితో పని చేస్తామని ఈ సందర్భంగా చంద్రబాబు అన్నారు. ఈ కార్యక్రమంలో మంత్రులు ఆనంద్ బాబు, జవహర్, ఎమ్యెల్సీ డొక్కా మాణిక్య వరప్రసాద్ తదితరులు పాల్గొన్నారు.

వైఎస్ రాజశేఖర్ రెడ్డి అధికారాన్ని అడ్డం పెట్టుకొని ఆయన తనయుడు జగన్మోహన్ రెడ్డి రూ.లక్షలకోట్ల అవినీతికి పాల్పడ్డారని బాబు ఆరోపించారు. అగ్రిగోల్డ్ బాధితులను ఆదుకుంటామని అన్నారు. రాష్ట్రప్రయోజనాలకు పనిచేస్తున్న తమకు ప్రజలు అండగా నిలవాలని బాబు పిలుపునిచ్చారు.