రాష్ట్ర ప్రజలే నా హైకమాండ్.. హోదా లేకున్నా ఏపీనే టాప్: చంద్రబాబు

కేంద్ర సహకారం లేకపోయినా అభివృద్ధిలో ఏపీ దూసుకుపోతుందన్నారు సీఎం చంద్రబాబు. పశ్చిమగోదావరి జిల్లా చింతలపూడిలో జరిగిన గ్రామదర్శిని కార్యక్రమంలో పాల్గొన్న సీఎం.. కేంద్రంపై మరోసారి విరుచుకుపడ్డారు. ప్రత్యేక హోదా, విభజన హామీల విషయంలో కేంద్రం నిర్లక్ష్యంగా వ్యవహరిస్తోందన్నారు సీఎం. వెనుకబడిన జిల్లాల అభివృద్ధికి రూ. వెయ్యి కోట్లు మాత్రమే ఇచ్చిందని.. విశాఖకు రైల్వే జోన్ ఇవ్వడానికి మీనమేషాలు లెక్కబెడుతోందని మండిపడ్డారు. కడప ఉక్కు ఫ్యాక్టరీ ఏర్పాటుకు అన్ని సౌకర్యాలు కల్పిస్తామని చెప్పినా కేంద్రం వెనకడుగు వేస్తోందన్నారు. విద్యా సంస్థల విషయంలోనూ మోసం చేసిందని దుయ్యబట్టారు.

దుగ్గిరాజపట్నంలో పోర్టు, విశాఖ-చెన్నై ఇండస్ట్రీయల్ కారిడార్ విషయంలో కూడా మోసం చేసిందని.. కాకినాడలో పెట్రో కెమికల్ కాంప్లెక్స్ వస్తే యువతకు ఉద్యోగాలు వస్తాయన్నారు సీఎం. విశాఖ, అమరావతికి మెట్రో రైలుగానీ, రాపెడ్ రోడ్ అండ్ రైల్ కనెక్టివిటీ.. ఇలా చాలా అంశాలు పెండింగ్‌లో ఉన్నాయన్నారు. ఏపీకి హోదా ఇవ్వకపోయినా.. ఈజ్ ఆఫ్ డూయింగ్ బిజినెస్‌లో దేశంలోనే నెంబర్ వన్‌గా నిలిచామన్నారు సీఎం. అమరావతి బాండ్లు ప్రభుత్వంపై నమ్మకంతో గంటలోనే లిస్టయ్యాయని.. అది కూడా తనపై ఉన్న నమ్మకమన్నారు. కాపు రిజర్వేషన్లపై కేంద్రానికి అసెంబ్లీ తీర్మానం పంపామని.. రిజర్వేషన్ల కోసం కేంద్రంపై పోరాడతామన్నారు బాబు.

అభివృద్ధికి వైసీపీ అడ్డుపడుతోందని విమర్శించారు సీఎం. ప్రతి శుక్రవారం కోర్టుకు వెళ్లేవాళ్లు కూడా తనను విమర్శిస్తున్నారని.. తాను ఎవరికీ భయపడనన్నారు. తనకు హైకమాండ్ ప్రజలేనని.. తన మీద తప్పుడు కేసులు పెట్టారని.. అయినా తనను ఏమీ చేయలేకపోయారన్నారు. నిప్పులా బతికానని అందుకే ఎవరికీ భయపడే సమస్యే లేదన్నారు. రాబోయే రోజుల్లో ఇదే ఉత్సాహంతో పనిచేస్తూ.. రాష్ట్రాన్ని అభివృద్ధిపథంలో నడిపిస్తామన్నారు సీఎం.