ఏపీలోని నిరుద్యోగులకు శుభవార్త

ఏపీలోని నిరుద్యోగులకు శుభవార్త. ఉద్యోగాల కోసం ఎప్పుడెప్పుడా అని ఎదురుచూస్తున్న నిరుద్యోగుల ఎదురు చూపులు ఫలించనున్నాయి. 20 వేల పోస్టుల నియామకానికి చంద్రబాబు నాయుడు ప్రభుత్వం మంగళవారం గ్రీన్‌ సిగ్నల్‌ ఇచ్చింది. నేటి ఉదయం అసెంబ్లీలోని తన ఛాంబర్‌లో చంద్రబాబు అధికారులతో ఉన్నతస్థాయి సమీక్ష సమావేశం నిర్వహించారు. రాష్ట్రంలో ఏయే శాఖల్లో ఖాళీలు ఉన్నాయనే దానిపై ఆధికారులతో చర్చించారు. ఈ మేరకు పోస్టుల భర్తీకి ఏపీ కేబినెట్‌ ఆమోదం తెలిపినట్లు సమాచారం. త్వరలోనే పోస్టుల భర్తీకి సంబంధించి పూర్తి వివరాలతో నోటిఫికేషన్‌ విడుదల కానుంది.

ఓవైపు ఎన్నికలు సమీపిస్తుండటం, మరోవైపు నిరుద్యోగ యువతను ఆకర్షించడంలో భాగంగా టీడీపీ ప్రభుత్వం 20వేల పోస్టుల నియామకాలు త్వరలో చేపట్టాలని భావిస్తోంది. అందులో భాగంగా రాష్ట్ర స్థాయి ఉద్యోగాలైన గ్రూప్‌ 1, 2, 3 పోస్టులతో పాటు టీచర్ పోస్టులు, పోలీస్‌ శాఖల్లోని ఖాళీలను భర్తీ చేయాలని రాష్ట్ర ప్రభుత్వం నిర్ణయం తీసుకుంది. తెలంగాణ తరహాలో ముందస్తుకు వెళ్లే యోచన లేని చంద్రబాబు.. సార్వత్రిక ఎన్నికల సమయానికల్లా వివిధ శాఖల్లో ఖాళీలను భర్తీ చేయాలని భావిస్తున్నారు.