కోడి పందేలు నిర్వహించుకోవచ్చు: హోం మంత్రి

సంక్రాంతి పండగకు 3 రోజుల పాటు కోడి పందేలు నిర్వహించుకోవచ్చని ఏపీ హోంమంత్రి నిమ్మకాయల చినరాజప్ప అన్నారు. చట్టాలను గౌరవిస్తూనే.. సంస్కృతి, సంప్రదాయాలను కాపాడుకోవాల్సిన బాధ్యత అందరిపై ఉందని ఆయన తెలపారు. ఏపీలో ఏటా సంక్రాంతికి ముందు కోడి పందేలపై వివాదాలు తెరపైకి రావడం.. అధికారులు హడావుడి చేయడం.. వాతావరణం వేడెక్కడం.. రాజకీయ నేతలు జోక్యం చేసుకొని గుట్టుచప్పుడు కాకుండా పరిస్థితిని చక్కబెట్టడం షరా మామూలే. నిషేధాజ్ఞ‌ లు ఉన్నా.. నేతల కనుసన్నుల్లో కోడి పందేలు యథేచ్చగా సాగిపోతుంటాయి. అయితే.. తాజాగా చినరాజప్ప ప్రకటనతో ఈసారి అవి మరింత ఎక్కువగా కొనసాగుతాయనడంలో ఎలాంటి సందేహం లేదు.

ఇటీవల మోకాలికి శస్త్రచికిత్స చేసుకున్న తూర్పుగోదావరి జిల్లా రాజమహేంద్రవరం గ్రామీణ ఎమ్మెల్యే గోరంట్ల బుచ్చయ్యచౌదరిని చినరాజప్ప శుక్రవారం (డిసెంబర్ 22) పరామర్శించారు. ఈ సందర్భంగా కోడి పందేలపై మీడియా అడిగిన ప్రశ్నకు పైవిధంగా స్పందించారు.

ఏపీలో సంక్రాంతి అనగానే.. కోడి పందేలు గుర్తుకొస్తాయి. ఉత్తరాంధ్రవాసులు మరో అడుగు ముందుకేసి కొత్త సంవత్సర వేడుకలతో పాటే కోడి పందేల్లో మునిగితేలుతారు. విజయనగరం, విశాఖపట్నం, శ్రీకాకుళం జిల్లాల్లో ఇప్పటికే ఈ సందడి మొదలైంది.