శిల్పా బ్రదర్స్‌ను వదిలిపెట్టను: అఖిలప్రియ

నంద్యాల ఉప ఎన్నికలో టీడీపీ ఘన విజయం సాధించిన తర్వాత శిల్పా సోదరులు పలాయనం చిత్తగించారని ఆంధ్రప్రదేశ్ మంత్రి భూమా అఖిలప్రియ ఎద్దేవా చేశారు. ఎన్నికల్లో ఓడిపోతే రాజకీయ సన్యాసం చేస్తానని చెప్పిన శిల్పా మోహన్ రెడ్డిని వదిలిపెట్టే ప్రసక్తే లేదని ఆమె అన్నారు. ప్రజల ముందుకు వచ్చి, రాజకీయ సన్యాసం చేస్తున్నానని చెప్పేంత వరకు వారిని వదిలి పెట్టే ప్రసక్తే లేదని పేర్కొన్నారు. గతంలో తన తండ్రి భూమా నాగిరెడ్డి గెలిచినప్పుడు కూడా శిల్పా బ్రదర్స్ ఇలాగే పారిపోయారని... ఇప్పుడు సోదరుడు బ్రహ్మానందరెడ్డి గెలిచిన తర్వాత కూడా పలాయనం చిత్తగించారని వ్యంగ్యాస్త్రాలు సంధించారు.

శిల్పా కుటుంబానికి చెందిన శిల్పా సహకార్, శిల్పా బ్యాంకులు ప్రజలను మభ్యపెట్టేందుకేనని దుయ్యబట్టారు. ఉప ఎన్నికల్లో టీడీపీ విజయం సాధించడంతో శుక్రవారం నంద్యాల టౌన్ హాల్లో అభినందన సభ నిర్వహించారు. ఈ కార్యక్రమానికి మంత్రి అఖిలప్రియ, భూమా బ్రహ్మానందరెడ్డిలతో పాటు మంత్రులు సోమిరెడ్డి చంద్రమోహన్ రెడ్డి, కాల్వ శ్రీనివాసులు హాజరయ్యారు. ఈ సందర్భంగా అఖిలప్రియ మాట్లాడుతూ, నంద్యాలలో గెలిస్తే మగాళ్లం, లేకపోతే ఆడవాళ్లమంటూ చెప్పారని... ఇప్పుడు ఆయన ఎక్కడికి పారిపోయారని ప్రశ్నించారు.

నంద్యాల ఉప ఎన్నికల షెడ్యూల్ వెలువడక ముందే నంద్యాలలో టిడిపి అభ్యర్థి భూమా బ్రహ్మనందరెడ్డి విజయం సాధించకపోతే తాను మంత్రి పదవికి రాజీనామా చేస్తానని మంత్రి భూమా అఖిలప్రియ ప్రకటించారు. అయితే తాను ఓడిపోతే రాజకీయ సన్యాసం తీసుకుంటానని వైసీపీ అభ్యర్థి శిల్పా మోహన్‌రెడ్డి ప్రకటించారు. రాజకీయాల్లో ఉన్న నేతలు ఏది పడితే అది మాట్లాడితే ఇబ్బందులు ఎదురయ్యే అవకాశాలు తప్పవన్నారు. మాట్లాడే ముందు జాగ్రత్తలు తీసుకోవాలని ఆమె సూచించారు. ఒకవేళ తాము ఓటమి పాలైతే తాను మంత్రి పదవికి రాజీనామా చేసేదాన్ని అని అఖిలప్రియ స్పష్టం చేశారు.