మంత్రి నారాయణకు ఆ సీటు ఖరారు?

ఏపీ మంత్రి నారాయణకు వచ్చే ఎన్నికల్లో ప్రత్యక్ష పోటీకి అనుగుణంగా నియోజకవర్గాన్ని ఖరారు చేశారట టీడీపీ అధినేత చంద్రబాబు నాయుడు. గత ఎన్నికల్లో నారాయణ పోటీ చేయని సంగతి తెలిసిందే. పోటీ చేయకపోయినా ఆయనను ఎమ్మెల్సీగా నామినేట్ చేసి, మంత్రి పదవిని కూడా ఇచ్చారు చంద్రబాబు నాయుడు. అయితే వచ్చేసారి మాత్రం నారాయణ ప్రత్యక్ష పోటీ పట్ల ఉత్సాహంతో ఉన్నట్టుగా తెలుస్తోంది.

ఈ మేరకు ఆయన ఇప్పటికే చాన్నాళ్ల నుంచి సొంత జిల్లా నెల్లూరులో ప్రత్యక్ష రాజకీయ వ్యవహారాల్లో యాక్టివ్‌గా ఉన్నారు. ఈ నేపథ్యంలో ఆయనకు నెల్లూరు సిటీ నుంచి అభ్యర్థిత్వాన్ని ఖరారు చేశారట చంద్రబాబు నాయుడు.

నెల్లూరు సిటీ నియోజకవర్గం ప్రస్తుతం వైఎస్సార్ కాంగ్రెస్ పార్టీ చేతిలో ఉంది. ఇక్కడ నుంచి అనిల్ కుమార్ యాదవ్ గత ఎన్నికల్లో భారీ మెజారిటీతో విజయం సాధించారు. ఈ నేపథ్యంలో ఇప్పుడు నారాయణ అక్కడ అభ్యర్థిగా రంగంలోకి దిగుతుండటం ఆసక్తిదాయకమైన అంశం.

అలాగే మరో మంత్రి కాలువ శ్రీనివాసులకు కూడా అభ్యర్థిత్వాన్ని ఖరారు చేశారట టీడీపీ అధినేత. ప్రస్తుతం కాలువ అనంతపురం జిల్లా రాయదుర్గం నుంచి ఎమ్మెల్యేగా ఉన్నారు. వచ్చే ఎన్నికల్లో కూడా రాయదుర్గంలో కాలువ పోటీ చేస్తారని తెలుగుదేశం వర్గాలు అంటున్నాయి.