కడపలో వైసీపీకి షాక్: టీడీపీ విజయం

కడప స్థానిక సంస్థల ఎన్నికల్లో వైకాపాకు గట్టి షాక్ తగిలింది. కచ్చితంగా గెలిచి తీరుతామనుకున్న స్థానంలో కూడా ఆ పార్టీకి ఓటమే మిగిలింది. కడపలో వైకాపా నుంచి జగన్ బాబాయ్ వైఎస్ వివేకానంద పోటీచేశారు. అతనిపై తెలుగుదేశం నుంచి పోటీ చేసిన బీటెక్ రవి విజయం సాధించారు. 33 ఓట్ల ఆధిక్యంతో వైఎస్ పై రవి గెలిచారు. టీడీపీ కూడా కడప గెలుపును ప్రతిష్ఠాత్మకంగా తీసుకుంది. ఆ స్థానాన్ని ఎలాగైనా చేజిక్కించుకోవాలని టీడీపీ-వైకాపాలు పావులు కదిపాయి. ఆ స్థానంలో ఎవరు గెలుస్తారన్న దానిపై బెట్టింగ్ లు కూడా జోరుగా సాగాయి. తెలుగు దేశం అభ్యర్థి గెలవడంతో వైకాపా శ్రేణుల్లో తీవ్ర నిరాశ నెలకొంది. టీడీపీ శ్రేణులు సంబరాలు చేసుకుంటున్నాయి.

కర్నూలు, నెల్లూరు, కడప ఎమ్మెల్సీ స్థానాలను టీడీపీయే సొంతం చేసుకుంది. ఒక్కస్థానంలో కూడా వైకాపాను రానివ్వలేదు. ఎన్నికల ఫలితాలు తెలుగు దేశం కార్యకర్తల్లో నాయకుల్లో కొత్త ఉత్సాహాన్ని నింపాయి.