AP Special Status: హోదా వచ్చుంటే అన్నకు ఉద్యోగం వచ్చేదని లేఖ రాసి తమ్ముడు ఆత్మహత్య

అన్నకు ఉద్యోగం రాలేదని తీవ్ర మనస్తాపానికి గురైన ఓ బాలుడు బలవన్మరణానికి పాల్పడ్డాడు. ఈ ఘటన కర్నూలు జిల్లా ప్యాపిలి మండలం జలదుర్గంలో చోటుచేసుకుంది. ప్రత్యేక హోదా రాలేదన్న మనస్తాపంతో పదో తరగతి విద్యార్థి మహేంద్ర ఆత్మహత్యకు పాల్పడినట్టు సూసైడ్‌ లేఖలో పేర్కొన్నాడు. పదో తరగతి చదువుతున్న మహేంద్ర, తన అన్నకు ఉద్యోగం రాలేదన్న కారణంతోనే ఉరి వేసుకుని ఆత్మహత్యకు పాల్పడ్డాడు. ప్రత్యేక హోదా వచ్చుంటే, తన అన్నకు ఉద్యోగం వచ్చుండేదని తన సూసైడ్ లేఖలో వివరించాడు. హోదా రాకపోవడం వల్లే తన అన్న నిరుద్యోగిగా ఉన్నాడని, దీంతో కుటుంబం గడవటం కష్టమైందని మహేంద్ర ఆ లేఖలో తెలిపాడు. అందుకే కుటుంబానికి భారం కాకూడదని నిర్ణయించుకున్నానని తన ఆవేదనను అక్షర రూపంలో వెల్లడించి బలవన్మరణానికి పాల్పడ్డాడు.

ఈ ఘటన గురించి తెలుసుకున్న పోలీసులు అక్కడకు చేరుకుని మహేంద్ర మృతదేహాన్ని పోస్టుమార్టం కోసం తరలించారు. కేసు నమోదు చేసుకుని దర్యాఫ్తు చేస్తున్నట్టు తెలిపారు. ఈ ఘటనపై స్పందించిన ఏపీ పీసీసీ అధ్యక్షుడు రఘువీరారెడ్డి మాట్లాడుతూ... మహేంద్ర కుటుంబానికి ప్రభుత్వం రూ.20 లక్షల పరిహారం చెల్లించాలని డిమాండ్ చేశారు. మహేంద్ర కుటుంబాన్ని రఘువీరా రెడ్డి, మాజీ ఎమ్మెల్యే కోట్ల సుజాతతో కలిసి పరామర్శించారు. మహేంద్ర మృతికి తమ ప్రగాఢ సానుభూతిని తెలియజేశారు. వారి కుటుంబానికి రూ.3 లక్షల ఆర్థికసాయం అందజేశారు. ఈ సందర్భంగా రఘువీరా మాట్లాడుతూ.. ప్రత్యేకహోదా కోసం మహేంద్ర ఆత్మహత్య చేసుకోవడం బాధాకరమన్నారు. మహేంద్ర కుటుంబానికి ప్రభుత్వం 20 లక్షల ఎక్స్‌గ్రేషియాతోపాటు అతడి సోదరుడుకి ప్రభుత్వ ఉద్యోగం ఇవ్వాలన్నారు. రాహుల్‌ ప్రధాని కాగానే హోదా, రైతు రుణమాఫీ చేస్తారని రఘువీరారెడ్డి స్పష్టం చేశారు.