ఏపీలో క్యాష్‌లెస్ గ్రామంగా ద్వారపూడి

ఏపీలో మరో గ్రామం క్యాష్‌లెస్ విలేజ్ (నగదు రహిత లావాదేవీల గ్రామం)గా గుర్తింపు పొందింది. విజయనగరం జిల్లాలోని ద్వారపూడిని డీటీఈ మోడల్ విలేజ్ గా కేంద్ర పౌర విమానయాన శాఖ మంత్రి అశోక్ గజపతి రాజు ప్రకటించారు. ఈ గ్రామాన్ని మంత్రి దత్తత తీసుకుని అభివృద్ధి చేస్తున్న సంగతి తెలిసిందే. ప్రధానమంత్రి నరేంద్రమోడి పిలుపు మేరకు ఈ గ్రామంలో నగదు రహిత లావాదేవీల పట్ల ప్రజల్లో అవగాహన కలిగించడంలో అధికారులు విజయవంతం అయ్యారు. ప్రస్తుతం ఈ గ్రామంలో నూటి 95శాతం వరకు లావాదేవీలు డిజిటల్ విధానంలోనే జరుగుతున్నాయని వారు చెప్పారు.

సోమవారం నాడు అశోక్ గజపతి రాజు ద్వారపూడిలో పర్యటించారు. ఈ సందర్భంగా ఆయన తన స్మార్ట్‌ఫోన్లోని ఎస్.బి.ఐ. బడ్డీ యాప్ ద్వారా స్థానిక కిరాణాషాపులో వాటర్ బాటిల్, చాక్లెట్లు కొనుగోలు చేశారు.