ఆయన నా కోచ్ కాదు.. రూ.15 లక్షలు ఎలా ఇస్తారు: ఆర్చర్ జ్యోతి సురేఖ

అర్జున అవార్డు గ్రహీత, విజయవాడకు చెందిన విలువిద్య క్రీడాకారిణి జ్యోతి సురేఖ కోచ్ విషయంలో వివాదం చెలరేగింది. అర్జున అవార్డు సాధించినందుకు ఆంధ్రప్రదేశ్ ప్రభుత్వం తనకు ప్రకటించిన కోటి రూపాయల ప్రోత్సాహకంలో కోత విధిస్తూ అధికారులు తీసుకున్న నిర్ణయంపై జ్యోతి సురేఖ తీవ్ర అభ్యంతరం వ్యక్తం చేస్తు్న్నారు. ముఖ్యమంత్రి చంద్రబాబు నాయుడు ప్రకటించిన కోటి రూపాయల ప్రోత్సాహకంలో రూ.15 లక్షలను కోచ్ చెరుకూరి సత్యనారాయణకు కేటాయిస్తూ స్పోర్ట్స్ అథారిటీ ఆఫ్ ఆంధ్రప్రదేశ్ (శాప్) అధికారులు నిర్ణయం తీసుకున్నారు. ఈ మేరకు ఒక జీవోను కూడా విడుదల చేశారు.

అయితే చెరుకూరి సత్యనారాయణ అసలు తన కోచ్ కాదంటూ జ్యోతి సురేఖ మీడియా ముందుకు వచ్చారు. తన తండ్రి వెన్నం సురేంద్రతో కలసి ఆదివారం విజయవాడలో మీడియాతో మాట్లాడారు. ఆంధ్రప్రదేశ్‌లో ఉన్నప్పుడు ఓల్గా ఆర్చరీ అకాడమీలో జయ రామారావు తనకు కోచ్‌గా వ్యవహరించారని చెప్పారు. ఆ తరవాత 2013 నుంచి జాతీయ అకాడమీలో శిక్షణ పొందుతున్నానని, అక్కడ జీవన్ జ్యోత్ సింగ్ తనకు కోచ్‌గా వ్యవహరించారన్నారు. 2012లో శాప్ ఆధ్వర్యంలోనే తాను అమెరికా వెళ్లి శిక్షణ పొందానని చెప్పారు. ఇప్పుడు ఎలాంటి సంబంధంలేని చెరుకూరి సత్యనారాయణకు తనకు కేటాయించిన మొత్తంలో రూ.15 లక్షలు కోత విధించి ఇవ్వడం దారుణమన్నారు.

అర్జున అవార్డు తీసుకున్న తరవాత కూడా వరల్డ్ ఛాంపియన్‌షిప్, ఏసియన్ ఛాంపియన్‌షిప్‌లో పతకాలు సాధించానని.. అయితే ఆ సమయంలో సాప్ నుంచి తనకు ఎలాంటి మెసేజ్‌లు కానీ, అభినందనలు కానీ రాలేదని జ్యోతి సురేఖ గుర్తుచేశారు. ఒకవేళ శాప్ అధికారులను కలుద్దామని వెళ్లినా తనకు అపాయింట్‌మెంట్ కూడా ఇవ్వలేదన్నారు. క్రీడాకారిణిగా తనకు శాప్ నుంచి కనీస ప్రోత్సాహం లేకపోగా.. వేధింపులకు దిగుతున్నారని ఆవేదన వ్యక్తం చేశారు. ఇలా చేస్తే భవిష్యత్తులో రాష్ట్రం తరపున ఎలా ఆడాలని ప్రశ్నించారు. సీఎం జోక్యం చేసుకుని తమకు న్యాయం చేయాలని.. లేని పక్షంలో సోమవారం నిరాహార దీక్షకు దిగుతామని జ్యోతి సురేఖ, ఆమె తండ్రి సురేంద్ర స్పష్టం చేశారు.