వీడియో: కంచ ఐలయ్యపై దాడికి యత్నం

వైశ్యులపై రాసిన పుస్తకంతో తెలుగు రాష్ట్రాల్లో వివాదాస్పదమైన రచయిత కంచ ఐలయ్యకు చేదు అనుభవం ఎదురైంది. బుధవారం (నవంబర్ 22) జగిత్యాల జిల్లా కోరుట్ల కోర్టులో హాజరయ్యేందుకు వచ్చిన ఐలయ్యపై ఆందోళనకారులు దాడికి ప్రయత్నించారు. పెద్ద ఎత్తున దాడికి దిగిన ఆందోళనకారులు ఐలయ్యపై కోడిగుడ్లు, టమోటాలు విసరడానికి ప్రయత్నించారు. ఆయనపై చెప్పులు విసిరి నిరసన తెలిపేందుకు యత్నించారు. సమాచారం అందుకున్న పోలీసులు అక్కడికి చేరుకుని ఆందోళనకారులను అడ్డుకున్నారు. అనంతరం ఐలయ్యకు రక్షణ కల్పించి సురక్షితంగా పంపించారు.

‘సామాజిక స్మగ్లర్లు - కోమటోళ్లు’ అనే పుస్తక రచనపై నమోదైన కేసులో ఐలయ్య.. కోర్టుకు హాజరయ్యేందుకు కోరుట్ల వచ్చారు. అంతకు ముందు జగిత్యాలలో ఆయన బస చేసిన లాడ్జి వద్ద బీజేవైఎం కార్యకర్తలు ఆందోళనకు దిగారు. హోటల్‌పై దాడి చేసేందుకు యత్నించారు. దీంతో హోటల్‌ వద్ద ఉద్రిక్త పరిస్థితి నెలకొంది. అప్రమత్తమైన పోలీసులు ఆందోళనకారులను అడ్డుకున్నారు.