నాకు ప్రాణహాని, అవయవాలు తీసుకుపోండి.. కత్తి దాడి నిందితుడికి అస్వస్థత

వైఎస్సార్ సీపీ అధినేత జగన్‌పై దాడి కేసు రోజుకో మలుపు తిరుగుతోంది. జగన్‌పై కత్తితో దాడిచేసిన నిందితుడు జనిపల్లి శ్రీనివాస రావు అస్వస్థతకు గురయ్యాడు. దీంతో పోలీసులు మంగళవారం (అక్టోబర్ 30) అతడికి చికిత్స అందించడానికి విశాఖ కింగ్ జార్జ్ ఆస్పత్రి (కేజీహెచ్‌)కి తరలించారు. అయితే.. తనకు వైద్య సాయం వద్దని, తన అవయవాలు తీసుకుపోండంటూ శ్రీనివాస రావు కోరడం షాక్‌కు గురిచేస్తోంది. కేజీహెచ్ ఆస్పత్రిలోకి వెళ్తూ.. శ్రీనివాస రావు తనకు ప్రాణ హాని ఉందనడం మరిన్ని అనుమానాలకు తావిస్తోంది.

విశాఖ విమానాశ్రయంలో జగన్‌పై కత్తితో దాడి చేసిన శ్రీనివాస రావును పోలీసులు అదుపులోకి తీసుకొని విచారిస్తున్న సంగతి తెలిసిందే. మూడో రోజు అతణ్ని విమానాశ్రయ పోలీస్‌ స్టేషన్‌లో విచారిస్తున్న సందర్భంగా.. అతడు తన ఆరోగ్యం సహకరించడంలేదని చెప్పాడు. చేతులు, ఛాతీలో నొప్పి ఉన్నట్టు శ్రీనివాస్ చెప్పడంతో పోలీసులు అప్రమత్తమయ్యారు. మధ్యాహ్నం భోజనం చేయడానికి కూడా శ్రీనివాస్ నిరాకరించినట్లు తెలుస్తోంది.

శ్రీనివాస్‌ను మొదట స్థానిక వైద్యుడు దేవుడుబాబు వద్దకు తీసుకెళ్లి పోలీసులు వైద్య పరీక్షలు చేయించారు. బీపీ, షుగర్‌ సాధారణ స్థితిలోనే ఉన్నాయని వైద్యుడు తెలిపాడు. కానీ, ఛాతీలో నొప్పి, చేతులు తిమ్మిరిగా ఉన్న నేపథ్యంలో కేజీహెచ్‌లో నిపుణులతో వైద్యం చేయిస్తే మంచిదని ఆయన సూచించారు.

వైద్యుడి సూచనమేరకు శ్రీనివాస రావుకు మెరుగైన వైద్యం అందించడానికి పోలీసులు అతణ్ని కేజీహెచ్‌కు తరలించడానికి సిద్ధమయ్యారు. అయితే.. తనకు వైద్య సహాయం వద్దని, తన అవయవాలు తీసుకుపోండంటూ శ్రీనివాస రావు చికిత్సకు నిరాకరించడం గమనార్హం. ఆ తర్వాత పోలీసులు అతణ్ని బలవంతంగా కేజీహెచ్‌కు తరలించారు. అక్కడ ఆస్పత్రిలోకి వెళ్తూ ‘నాకు ప్రాణ హాని ఉంది సార్’ అంటూ మీడిమా ప్రతినిధులతో చెప్పాడు.