పవన్ అభిమానిపై బాలయ్య ఫ్యాన్ బ్లేడుతో దాడి!

సంక్రాంతి బరిలో నిలిచిన తమ కథానాయకుల సినిమాలపై అభిమానులు మధ్య తలెత్తిన వివాదం దాడికి దారితీసింది. మాటా మాటా పెరిగి బ్లేడుతో దాడిచేసే స్థాయికి చేరింది. ఈ ఘటన ఆంధ్రప్రదేశ్‌లోని శ్రీకాకుళం జిల్లాలో చోటుచేసుకుంది. ఇచ్చాపురం మండలంలో అజ్ఞాతవాసి, జై సింహా సినిమాల విషయంలో బాలయ్య, పవన్ అభిమానుల మధ్య మొదలైన వాగ్వాదం ఘర్షణకు దారి తీసి దాడిచేసే వరకు వెళ్లింది పురుషోత్తపురం గ్రామానికి చెందిన పవన్ అభిమాని దనపాన హరిశ్చంద్రతో బాలయ్య అభిమాని చాట్ల ఫకీరు ఘర్షణ పడ్డారు. దీంతో స్థానికులు జోక్యం చేసుకుని సర్ది చెప్పడంతో అక్కడితో వివాదం సద్దుమణిగడంతో వారు వెళ్లిపోయారు.

ఘర్షణ జరిగిన చోట చెప్పులు మరిచిపోయిన హరిశ్చంద్ర తిరిగి అదే స్థలానికి వెళ్లగా అక్కడే ఉన్న ఫకీరు బ్లేడుతో దాడి చేశాడు. దీంతో హరిశ్చంద్రకు మెడ, చెవి కిందిభాగంలో గాయాలయ్యాయి. బాధితుడు దీనిపై పోలీసులకు ఫిర్యాదు చేశాడు. పవన్ అభిమాని హరిశ్చంద్రను చికిత్స కోసం ఇచ్ఛాపురం ప్రభుత్వ ఆసుపత్రికి తరలించారు. సమాచారం అందుకున్న పోలీసులు ఘటనా స్థలానికి చేరుకుని పవన్ అభిమానిపై దాడిచేసిన వ్యక్తిని అదుపులోకి తీసుకున్నారు. దాడికి పాల్పడిన స్థలం ఒడిశా పరిధిలో ఉండటంతో వారికి కేసు బదలాయిస్తామని సీఐ తెలిపారు. ఈ ఘటనకు సంబంధించి మరిన్ని వివరాలు అందాల్సి ఉంది.