కుటుంబ ఖాతాల్లోకి రూ. 58 లక్షలు.. బ్యాంక్ అధికారి అరెస్టు

తప్పుడు మార్గాల్లో సంపాదనపై దృష్టి సారించి పని చేస్తున్న బ్యాంకుకే కన్నంవేసిన ఓ ప్రబుద్ధుణ్ని టాస్క్‌ఫోర్స్ పోలీసులు అరెస్టు చేశారు. అతడి నుంచి రూ. 56 లక్షలకు పైగా సొత్తును స్వాధీనం చేసుకున్నారు. చందానగర్‌కు చెందిన పారోల్ సుబ్రమణ్యన్ మురళి సికింద్రాబాద్‌లోని ఏపీ మహాజన్ కో-ఆపరేటివ్ అర్బన్ బ్యాంక్‌లో సీనియర్ మేనేజర్‌గా పని చేస్తున్నాడు. అక్రమార్జనపై దృష్టి సారించిన మురళి.. కుటుంబ సభ్యుల పేరుపై తీసిన ఖాతాలలోకి తప్పుడు మార్గంలో పెద్ద మొత్తంలో డబ్బులు తరలించాడు.

ఆర్టీజీఎస్, ఎన్‌‌డీఎఫ్‌టీ ద్వారా అనైతిక లావాదేవీలు కొనసాగించిన మురళి.. మొత్తం 35 అకౌంట్లలోకి రూ. 58,49,566ను డిపాజిట్ చేశాడు. సీనియర్ మేనేజర్లకు అనుమానం వచ్చి పోలీసులను ఆశ్రయించడంతో ఉత్తర మండలం టాస్క్‌ఫోర్స్ అధికారులు ప్రత్యేక దర్యాప్తు చేశారు. మురళి చీటింగ్ గుట్టు రట్టు చేశారు. అతణ్ని అదుపులోకి తీసుకున్నారు.


2014 నవంబర్ నుంచి సదరు బ్యాంకు శాఖలో మురళి పనిచేస్తున్నాడు. బ్యాంకు ఉన్నతాధికారులకు తెలియకుండా తన సొంత అవసరాల కోసం పెద్ద మొత్తంలో నగదు తరలించాడు. రాధాకిషన్ రావు నేతృత్వంలోని టాస్క్‌ఫోర్స్ బృందం మురళిని అరెస్టు చేసింది.