బతుకమ్మ చీర: తల్లీ.. ఏంది మీ లొల్లి!

తెలంగాణ ప్రభుత్వం ప్రతిష్టాత్మకంగా చేపట్టిన పేద మహిళలకు బతుకమ్మ చీరల పంపిణీ కార్యక్రమం సోమవారం నుంచి రాష్ట్ర వ్యాప్తంగా ప్రారంభమైంది. అయితే ఈ చీరలు బాగాలేవంటూ పలు చోట్ల నిరసనలు వ్యక్తమయ్యాయి. కొంతమంది మహిళలు చీరలను తగలబెట్టారు కూడా. అయితే ఇదంతా ప్రతిపక్షాల కుట్ర అని, చీరలు బ్రహ్మండంగా ఉన్నాయని ప్రభుత్వ పెద్దలు చెప్పుకొస్తున్నారు. ఏదేమైనా ఆడాళ్లతో పెట్టుకున్న ప్రభుత్వం అబాసుపాలందైనే చెప్పాలి.

ఇదిలా ఉంటే హైదరాబాద్‌లోని సైదాబాద్‌లో ఏర్పాటుచేసిన బతుకమ్మ చీరల పంపిణీ కేంద్రం వద్ద మహిళల కొట్లాట ప్రస్తుతం సోషల్ మీడియాలో వైరల్ అవుతోంది. వారి మధ్య ఎందుకు ఘర్షణ చెలరేగిందో స్పష్టంగా తెలియదు కానీ.. కొప్పులు పట్టుకుని చితక్కొట్టుకున్నారు. క్యూ లైన్లలో నిలుచున్న మహిళల మధ్య చెలరేగిన గొడవ.. రెండు మహిళా వర్గాల గొడవగా మారిపోయింది. దీంతో రంగంలోకి వదిగిన పోలీసులు వారిని చెదరగొట్టారు. సర్దిచెప్పి అక్కడి నుంచి పంపేశారు. అయితే ఈ పంపిణీ కేంద్రంలో చీరలు తక్కువగా ఉన్నాయని, ముందుగా వెళ్లకపోతే అయిపోతాయేమోననే భయంతో క్యూ లైన్లలో మహిళలు తోసుకున్నారని, ఈ కారణంగానే గొడవ జరిగిందని సమాచారం.