లంచం అడిగిన వాళ్లని చెప్పుతో కొట్టండి: సీఎం కేసీఆర్

ఇటీవల జరిగిన సింగరేణి కార్మిక సంఘాల ఎన్నికల్లో టీబీజీకేఎస్ విజయం సాధించిన నేపథ్యంలో సింగరేణి కార్మికులు ఈరోజు హైదరాబాద్‌లో‌ని ప్రగతి భవన్‌లో తెలంగాణ సీఎం కేసీఆర్‌ని కలిశారు. సింగరేణి కార్మికులతో ఆత్మీయ సమ్మేళనం సందర్భంగా వారిని ఉ్దదేశించి మాట్లాడిన సీఎం కేసీఆర్.. కార్మికులు ఇంతకాలంగా ఎదుర్కొంటున్న సమస్యలన్నీ త్వరలోనే పరిష్కరిస్తామని మరోసారి స్పష్టం చేశారు. త్వరలోనే సింగరేణి యాత్ర పేరిట తానే స్వయంగా వచ్చి కార్మికులని కలుస్తానని.. వారి సమస్యలను అక్కడే అడిగి తెలుసుకుని వాటిని పరిష్కరిస్తానని హామీ ఇచ్చారు.

ఇన్నాళ్లు కార్మిక సంఘాలని అడ్డం పెట్టుకుని సంఘాల నాయకులే లాభపడ్డారన్న సీఎం కేసీఆర్... ఇకపై కార్మికులు కూడా లభ్ధి పొందుతారని అన్నారు. కార్మికులు సింగరేణి ఫలాలని అందుకునే క్రమంలో వారిని ఎవరైనా లంచం అడిగితే ఊరుకునే ప్రసక్తేలేదని కేసీఆర్ తేల్చిచెప్పారు. కార్మికులు తమని లంచం అడిగిన వారిని ఉపేక్షించకుండా పై స్థాయి వారికి ఫిర్యాదు చేయండని.. ఇంకా అవసరమైతే వారిని చెప్పుతో కొట్టాలని కార్మికులకి సూచించారు.