బీర్ హెల్తీ డ్రింక్.. మంత్రి వ్యాఖ్యలపై రచ్చ

బీర్ హెల్తీ డ్రింక్ అంటూ.. దాన్ని ప్రభుత్వమే ప్రమోట్ చేస్తుందని ప్రకటించిన ఆంధ్రప్రదేశ్ ఎక్సైజ్‌శాఖ మంత్రి కె.ఎస్. జవహర్ వ్యాఖ్యలపై సర్వత్రా విమర్శలు వెల్లువెత్తుతున్నాయి. ప్రమాదకరమైన మద్యం స్థానాన్ని భర్తీ చేయడానికి బీర్, తాటి కల్లు, ఈత కల్లుకు ప్రచారం కల్పిస్తామని జవహర్ చెప్పారు. ఈత కల్లును తెల్లవారుజామున 4 గంటలకు తీసి హెల్తీ డ్రింక్‌గా ప్రమోట్ చేస్తామని తెలిపారు. మహారాష్ట్రలో లీటరు రూ. 130కి ఈత కల్లు అమ్ముతున్నారంటే ఇది ఎంత మంచి హెల్తీ డ్రింకో అర్థమవుతుందన్నారు. కల్లును కూడా ఎక్కడా కల్తీ లేకుండా అమలు చేయడానికి కొత్త పాలసీని తీసుకొస్తున్నట్లు చెప్పారు.

ఇప్పటికే ఏపీలో కొత్త ఎక్సైజ్ పాలసీపై మహిళా సంఘాలు భగ్గుమంటుంటే ఇప్పుడు మంత్రి గారి వ్యాఖ్యలు మరింత దుమారం రేపుతున్నాయి. మంత్రి వ్యాఖ్యలపై ఇటు విపక్ష నేతలతో పాటు మహిళా సంఘాలు మండిపడుతున్నాయి. ఆల్కాహల్ కంటెంట్ కలిగిన బీర్‌ను హెల్తీ డ్రింక్‌గా ప్రమోట్ చేయడమేంటని ప్రశ్నిస్తున్నారు. అసలు బీర్‌లో ఎంత ఆల్కహాల్ శాతముంటుందో మంత్రి తెలుసా? అని మండిపడుతున్నారు. కాగా, మద్యం దుకాణాల ముందు పెద్ద పెద్ద వరుసలు కట్టి కొనే వారు ఉన్నప్పుడు అమ్మితే తప్పేమిటని జవహర్ చేసిన వ్యాఖ్యలు ఆశ్చర్యానికి గురిచేస్తున్నాయి. కొత్త మద్యం పాలసీ గురించి ఆయన సోమవారం మాట్లాడారు.

మద్యం దుకాణాల రెన్యూవల్‌పై తాము దృష్టి సారించామని జవహర్ చెప్పారు. మంగళవారంలోగా శాశ్వత పరిష్కారం చూపుతామన్నారు. అది సాధ్యం కాకపోతే తాత్కాలికంగా లైసెన్సుల పునరుద్ధరణ చేస్తామన్నారు. ఇప్పటి వరకు 23 శాతం దుకాణాలు, 11 శాతం బార్ల లైసెన్సులు రెన్యూవల్ అయ్యాయని తెలిపారు. ఇళ్ల మధ్య మద్యం దుకాణాలు పెడుతున్నారని ఆందోళన చెందవద్దని, దీనిపై మహిళా ప్రతినిధి బృందాలను పంపితే తాము మాట్లాడుతామని వివరణ ఇచ్చారు. ఊళ్లలో మద్యం దుకాణాలు వద్దని ఆడపడుచులు కోరితే ఆ మేరకు నిర్ణయం తీసుకుంటామన్నారు.