పార్టీ మారనంటూనే కాంగ్రెస్‌కు షాకిచ్చిన గండ్ర.. సతీసమేతంగా కేటీఆర్‌తో భేటీ

టీఆర్ఎస్ ‘ఆపరేషన్ ఆకర్ష్’ దెబ్బకు కాంగ్రెస్ విలవిల్లాడుతోంది. ఎమ్మెల్యేలు చేజారకుండా ప్రయత్నాలు చేస్తున్న హస్తం పార్టీకి మరో ఎదురుదెబ్బ తగిలింది. భూపాలపల్లి ఎమ్మెల్యే గండ్ర వెంకట రమణారెడ్డి కాంగ్రెస్‌ పార్టీని వీడుతున్నట్లు ప్రకటించారు. సోమవారం రాత్రి టీఆర్ఎస్ వర్కింగ్ ప్రెసిడెంట్ కేటీఆర్‌ను ఆయన సతీసమేతంగా కలిశారు. అనంతరం టీఆర్‌ఎస్‌లో చేరనున్నట్టు ప్రకటించారు. తన నియోజకవర్గ ప్రజలకిచ్చిన హామీలు నెరవేర్చడం కోసమే టీఆర్‌ఎస్‌లో చేరుతున్నానని ఆయన తెలిపారు. గత ఎన్నికల్లో ఆయన మాజీ స్పీకర్ మధుసూదనాచారిపై విజయం సాధించారు.గండ్ర పార్టీ మారతారని గత రెండు రోజులుగా ప్రచారం జరుగుతోంది. దీంతో కేటీఆర్‌తో ఆయన భేటీ కావడానికి ముందు.. కాంగ్రెస్ నేతలు మల్లు భట్టి విక్రమార్క, దుద్దిళ్ల శ్రీధర బాబు గండ్రను కలిసి బుజ్జగించారు. దీంతో తాను కాంగ్రెస్‌ను వీడటం లేదని ఆయన తెలిపారు. పార్టీ మారుతున్నానని వస్తున్న వార్తలను ఖండించారు. కానీ వెంటనే ఆయన నిర్ణయం మార్చుకోవడం గమనార్హం.

భూపాలపల్లి ఎమ్మెల్యే అయిన గండ్ర వెంకట రమణారెడ్డి టీఆర్ఎస్‌లోకి వస్తే ఆయన భార్యకు జడ్పీ చైర్ పర్సన్ పదవి ఇస్తానని కేసీఆర్ హామీ ఇచ్చారని సమాచారం. స్థానిక సంస్థలకు త్వరలోనే ఎన్నికలు జరగనుండగా.. మెజార్టీ జెడ్పీ చైర్‌పర్సన్ స్థానాలను గెలుచుకోవాలని టీఆర్ఎస్ భావిస్తోంది. అందులో భాగంగానే కాంగ్రెస్ ఎమ్మెల్యేలను పార్టీలోకి చేర్చుకుంటోంది.

గండ్రతోపాటు సంగారెడ్డి ఎమ్మెల్యే జగ్గారెడ్డి, భద్రాచలం ఎమ్మెల్యే పోడెం వీరయ్య కూడా టీఆర్ఎస్‌లో చేరతారని వార్తలొస్తున్నాయి.