పవన్ కల్యాణ్ మానసిక స్థితి బాగోలేదు!

జనసేన అధ్యక్షుడు పవన్ కల్యాణ్ మానసిక స్థితిపై సందేహాలు వ్యక్తం చేశారు బీజేపీ అధికార ప్రతినిధి కృష్ణ సాగర్ రావు. పవన్ చిత్రవిచిత్రంగా ప్రవర్తిస్తున్నాడని.. ఇది సినిమా కాదని గుర్తుంచుకోవాలని ఈ బీజేపీ నేత సూచించారు. భారతీయ జనతా పార్టీకి ఉత్తర, దక్షిణ అనే బేధాలు ఏవీ లేవని ఆయన వ్యాఖ్యానించారు.

జాతీయ సమగ్రత భారతీయ జనతా పార్టీ విధానం అని వ్యాఖ్యానించారు. ప్రధానమంత్రి నరేంద్రమోడీ దేశం మొత్తాన్నీ టీం ఇండియాగా భావించి ముందుకు తీసుకెళ్తున్నారని అన్నారు. పవన్ కల్యాణ్ సినిమాల్లోలాగా చిత్రవిచిత్రంగా ప్రవర్తిస్తున్నారని ఈ కమలం పార్టీ నేత ఎద్దేవా చేశారు.

పవన్ కల్యాణ్ అన్న చిరంజీవి ‘ప్రజారాజ్యం’ పార్టీని పెట్టి తగు రేటుకు దాన్ని అమ్మేశారని, మీ కథేంటి? అంటూ ప్రశ్నించారు కృష్ణ సాగర్ రావు. కేంద్రాన్ని విమర్శించడం సరికాదు, దేనికైనా ఆధారాలతో మాట్లాడాలి అని, ట్విటర్ లో రాజకీయ కామెంట్లు పెట్టడం రాజకీయ నిరుద్యోగతనం అని విమర్శించారు. కేంద్ర ప్రభుత్వం దక్షిణాది సంస్కృతిని గౌరవించాలని.. లేకపోతే వేర్పాటు వాదం పుట్టుకొస్తుందని పవన్ కల్యాణ్ ట్వీట్ చేసిన సంగతి తెలిసిందే. ఈ నేపథ్యంలో బీజేపీ నుంచి ఈ ప్రతిస్పందన వ్యక్తమైంది.