KTRను కేసీఆర్ మభ్యపెడుతున్నారు, ఆ నలుగురం ఫోకస్ పెడితే.. బీజేపీ ఎంపీ ఆసక్తికర వ్యాఖ్యలు

లోక్ సభ ఎన్నికల్లో తెలంగాణలో నాలుగు సీట్లు గెలుపొందిన బీజేపీ.. రాష్ట్రంలో పార్టీ విస్తరణపై ఫోకస్ పెట్టింది. వచ్చే ఎన్నికల్లో టీఆర్ఎస్‌కు ప్రత్యామ్నాయంగా ఎదగాలని భావిస్తోంది. ఇతర పార్టీల నేతలను చేర్చుకోవడంపై దృష్టి సారించిన కమలం పార్టీ.. అధికార టీఆర్ఎస్‌పై వ్యూహాత్మక దాడికి దిగుతోంది. ఓ రకంగా కాషాయ పార్టీ దూకుడు గులాబీ పార్టీని కలవరపెడుతోంది. కానీ కేసీఆర్ మాత్రం పైకి లైట్ తీసుకుంటున్నట్టుగా కనిపిస్తున్నారు. ఆరు నెలలు అరిచి.. అరిచి.. వాళ్లే ఊరుకుంటారని బీజేపీ నేతలను ఉద్దేశించి కేసీఆర్ వ్యాఖ్యానించారు.

తెలంగాణ సీఎం వ్యాఖ్యల పట్ల నిజామాబాద్ బీజేపీ ఎంపీ ధర్మపురి అరవింద్ ఘాటుగా స్పందించారు. కేసీఆర్‌ది మేకపోతు గాంభీర్యమని ఎద్దేవా చేసిన ఆయన.. బీజేపీ భయంతోనే కేసీఆర్ ముందస్తు అసెంబ్లీ ఎన్నికలకు వెళ్లారన్నారు. తాను ఓడితే పథకాలు ఆగిపోతాయని.. మహిళలు, యువకులను భయపెట్టి కేసీఆర్ ఎన్నికల్లో గెలిచారని ఆయన విమర్శించారు. బీజేపీ అంటే నీకు భయం లేకపోతే.. దమ్ముంటే మున్సిపల్ ఎన్నికలను ప్రత్యక్ష పద్ధతిలో నిర్వహించమని ఆయన సవాల్ చేశారు.

‘‘పొద్దస్తనమానం.. నలుగురే గెలిచిన్రు అంటున్నవ్. దిక్కులు కూడా నాలుగే ఉంటాయి. ఆ నలుగురు కలిసి నీ దిక్కు ఫోకస్ పెడితే దిక్కుమాలిన స్థితికి చేరతవ్. ఆ నలుగురే టీఆర్ఎస్ పార్టీని బొందలోకి నెడతరు. నీ బిడ్డనే కాపాడుకోని నువ్వు టీఆర్ఎస్ పార్టీని ఏం కాపాడతవ్. ప్రజల్నే కాదు.. నీ కొడుకును కూడా మభ్య పెడుతున్నావ్. కేటీఆర్‌కు సీఎం కావాలని ఉంది’’ అని అరవింద్ కేసీఆర్‌పై విమర్శలు గుప్పించారు.

‘‘ఆరు నెలలు అరిచి మేం నలుగురం అలసిపోతాం అంటున్నావ్.. అలిసిపోయినందుకే నువ్వు ఫామ్ హౌస్‌లో పడుకున్నావ్. నీకు పదవీ వ్యామోహం ఉంది. డిప్యూటీ ప్రధాని కావాలని కలగంటివి. అధికార దాహం ఉంది కాబట్టే.. అవినీతి సొమ్మును కర్ణాటక, తమిళనాడు, ఆంధ్రాకు పంపించావ్’’ అంటూ తెలంగాణ సీఎంపై ఆయన ఘాటైన విమర్శలు గుప్పించారు.