‘కాపు’గాసి.. ‘కమ్మ’గా టీడీపీని నిర్వీర్యం చేయడమేనా అసలు ప్లాన్?

లోక్ సభ ఎన్నికల్లో ఉత్తరాదిన సత్తా చాటిన బీజేపీ దక్షిణాదిన మాత్రం ఆకట్టుకోలేకపోయింది. ఒక్క కర్ణాటకలోనే కమలం వికసించింది. తెలుగు రాష్ట్రాల్లో తెలంగాణలో నాలుగు ఎంపీ సీట్లను గెలుపొందిన బీజేపీ.. ఏపీలో మాత్రం బోణీ కొట్టలేకపోయింది. దీంతో తెలుగు రాష్ట్రాలపై ఆ పార్టీ ఫోకస్ పెట్టింది. ఏపీలో బలపడటం కోసం టీడీపీకి చెందిన కీలక నేతలకు గాలం వేస్తోంది. ఆపరేషన్ కమలంతో ఇప్పటికే నలుగురు రాజ్యసభ సభ్యులను సైకిల్ దిగి కాషాయ కండువా కప్పుకున్నారు. బీజేపీ నేతల మాటలను బట్టి చూస్తే.. ఇది జస్ట్ ట్రైలర్ మాత్రమే అనిపిస్తోంది.

టీడీపీని మొత్తం ఖాళీ చేసి.. ఏపీలో ప్రతిపక్ష స్థానాన్ని తానే భర్తీ చేయాలనేది బీజేపీ వ్యూహంగా తెలుస్తోంది. సామాజిక వర్గాల వారీగా ఆ పార్టీ ఫోకస్ పెట్టిందని భావిస్తున్నారు. కాపు సామాజిక వర్గానికి చెందిన 12 మంది మాజీ ఎమ్మెల్యేలు కాకినాడలో భేటీ కావడం ఆసక్తి కలిగిస్తోంది. వీరంతా బీజేపీలో చేరతారని ప్రచారం జరుగుతోంది.

రాష్ట్రంలోని కాపు నేతలను ముందుగా పార్టీలో చేర్చుకొని... తర్వాత కమ్మ సామాజిక వర్గానికి చెందిన నేతలను పార్టీలో చేర్చుకోవాలని బీజేపీ నాయకత్వం భావిస్తోందని సమాచారం. టీడీపీ ఏర్పాటు నుంచి కమ్మ సామాజికవర్గం ఆ పార్టీని తమదిగా భావిస్తోంది. 2014 ఎన్నికల్లో కాపులు సైకిల్‌కి జైకొట్టారు. టీడీపీని ఇంటిపార్టీగా భావించే సామాజిక వర్గం నేతల్ని, సంఖ్యాపరంగా ఏపీలో ఎక్కువగా ఉన్న కాపు నేతలను తమవైపు తిప్పుకోవడం ద్వారా బలపడాలనేది బీజేపీ వ్యూహంగా తెలుస్తోంది.