వరుడి ఒంటికి నిప్పు: చికిత్స పొందుతూ యాకయ్య మృతి

ఫిబ్రవరి 18 న జనగామ జిల్లా కంచనపల్లిలో వరుడిపై పెట్రోలుపోసి నిప్పంటించిన విషయం తెలిసిందే. ఈ ఘటనలో వరుడు యాకయ్యతోపాటు ఆయన తల్లి కూడా గాయపడ్డారు. 60 శాతం కాలిన గాయాలతో సికింద్రాబాద్‌లోన గాంధీ ఆస్పత్రిలో చికిత్స పొందుతున్న యాకయ్య శనివారం మృతి చెందాడు. దీంతో కంచనపల్లిలో విషాదం నెలకొంది. యాకయ్యను వివాహం చేసుకోవడం ఇష్టంలేని వధువు అరుణ అతడి హత్యకు ప్రియుడి సాయంతో కుట్ర పన్నినట్లు గుర్తించిన పోలీసులు వారిని బుధవారం నాడు అదుపులోకి తీసుకున్నారు. మాదారం గ్రామానికి చెందిన అరుణకు యాకయ్యతో వివాహం నిశ్చయమైంది. వివాహాన్ని ఫిబ్రవరి 21 న జరిపించాలని ఇరు కుటుంబాలు నిర్ణయించాయి. అయితే, వరుసకు సోదరుడయ్యే బాలస్వామితో అరుణ లైంగిక సంబంధం పెట్టుకుంది.

దీంతో ఈ పెళ్లి ఇష్టంలేని అరుణ వరుడు యాకయ్యను గానీ, ఆయన తండ్రినిగానీ హత్యచేయాలనుకుంది. వీరి హత్యలకు బాలస్వామితో కలిసి వ్యూహం రచించింది. ఇందులో భాగంగానే ఫిబ్రవరి 18, 17 తేదీల్లో యాకయ్య తండ్రిపై బాలస్వామి దాడి చేశాడు. అయితే ఆయన తప్పించుకోవడంతో 18 రాత్రి యాకయ్యను హత్యచేయాలని పథకం పన్నారు. దీంతో బాలస్వామి కంచనపల్లికి వెళ్లి యాకయ్య ఇంటి సమీపంలో మాటు వేశాడు. ఇంతలో యాకయ్యకు ఫోన్‌చేసిన అరుణ సిగ్నల్ సరిగ్గా అందడంలేదని, బయటకు వచ్చి మాట్లాడమని చెప్పింది. ఆమె దురుద్దేశాన్ని గ్రహించలేకపోయిన యాకయ్య ఇంట్లో నుంచి బయటి వచ్చాడు. అతడు రాగానే అక్కడే మాటు వేసిన బాలస్వామి బాటిల్‌లోని పెట్రోల్‌ను యాకయ్యపై పోసి నిప్పంటించాడు.

ఒంటికి నిప్పంటుకుని కేకలు వేయడంతో కుటుంబసభ్యులు వచ్చి మంటలను ఆర్పివేశారు.ఈ క్రమంలో ఆయన తల్లికి కూడా గాయాలయ్యాయి. 60 శాతం గాయాలైన యాకయ్యను మెరుగైన వైద్యం కోసం గాంధీ హాస్పిటల్‌కు తరలించారు. ఈ ఘటనపై కేసు నమోదుచేసిన పోలీసులు కాల్ డేటా ఆధారంగా దర్యాప్తు చేపట్టి నిందితులు అరుణ, బాలస్వామిని అదుపులోకి తీసుకున్నారు. ఇద్దర్నీ విచారించగా నేరం చేసినట్లు అంగీకరించారు. పెళ్లిని ఆపడానికే యాకయ్యపై హత్యాయత్నం చేసినట్లు నిందితులు వెల్లడించారు.