భవన నిర్మాణ సేవలు ఆన్ లైన్లో - కేటీఆర్

హైదరాబాద్: భవన నిర్మాణ సేవలను ఇక నుంచి ఆన్ లైన్లో ఉంచాలని నిర్ణయం తీసుకున్నట్లు తెలంగాణ ఐటీ మంత్రి కేటీఆర్ పేర్కొన్నారు. హెచ్ఎండీఏ కార్యాలయంలో మంత్రి కేటీఆర్ బుధవారం ఆన్ లైన్ సేవలను ప్రారంభించారు. ఈ సందర్భంగా ఆయన మాట్లాడుతూ ఈ ఆన్ లైన్ సేవలను జీహెచ్ఎంసీ సహా రాష్ట్రంలోని అన్ని మున్సిపాలిటీల్లో జూన్ నాటికి అమల్లోకి తీసుకువస్తామన్నారు. దళారీ వ్యవస్థను అరికట్టేందుకు సేవలను ఆన్ లైన్లో ఉంచుతున్నట్లు మంత్రి వెల్లడించారు. తాజా నిర్ణయంతో ఇళ్ల నిర్మాణ అనుమతుల కోసం కార్యాలయాల చుట్టూ తిరిగే పని నుంచి విముక్తి కల్పించినట్లయింది. ఇళ్ల నిర్మాణాల అనుమతులతో పాటు లే అవుట్, భూ బదలాయింపు సేవలు కూడా ఆన్ లైన్లోనే ఉంచాలని నిర్ణయం తీసుకున్నారు.