బుధవారం సినారె అంత్యక్రియలు

ప్రముఖ కవి, సినీ గేయ రచయిత డాక్టర్ సి. నారాయణ రెడ్డి అంత్యక్రియలను బుధవారం నిర్వహించనున్నారు. కుటుంబ సభ్యుల నిర్ణయం మేరకు జూబ్లీహిల్స్‌లోని మహాప్రస్థానంలో సినారె అంత్యక్రియలు నిర్వహించనున్నారు. సీఎం కేసీఆర్ ఆదేశాల మేరకు అధికారిక లాంఛనాలతో సినారె అంత్యక్రియలు నిర్వహించనున్నట్లు సినిమాటోగ్రఫీ మంత్రి తలసాని శ్రీనివాస్ యాదవ్ ప్రకటించారు. ఐటీ, మున్సిపల్ శాఖ మంత్రి కె. తారక రామారావుతో కలసి సినారె భౌతిక ఖాయానికి ఆయన నివాళులర్పించారు.

గత కొంతకాలంగా అనారోగ్యంతో బాధపడుతున్న సినారె సోమవారం ఉదయం 8 గంటల సమయంలో తుదిశ్వాస విడిచారు. కేర్ ఆసుపత్రిలో చికిత్స పొందుతున్న సినారె గుండెపపోటుతో మరణించినట్లు వైద్యులు వెల్లడించారు. సినారెకు భార్య సుశీల, నలుగురు కుమార్తెలు గంగ, యమున, సరస్వతి, కృష్ణవేణి ఉన్నారు. సినారె మృతికి తెలుగు చిత్ర పరిశ్రమ తీవ్ర విచారం వ్యక్తం చేసింది. తెలుగు సినీ ప్రముఖులు వెంకటేశ్, కోటా శ్రీనివాసరావు, హరికృష్ణ, పరిచూరి గోపాలకృష్ణ, బ్రహ్మానందం తదితరులు సినారె భౌతిక ఖాయానికి నివాళులర్పించారు.