మెట్రో రైలు కంటే... మాకు అవే ముద్దు!

హైదరాబాద్‌లో మెట్రో రైలు అందుబాటులోకి వచ్చినా, చిటికెలో చెంతకు వచ్చి, గమ్యం చేర్చే... ఆటో, క్యాబ్‌లే తమకు ముద్దని ప్రజలు చెబుతున్నారు. ట్రాన్స్‌పోర్ట్ అథారిటీ లెక్కల ప్రకారం... హైదరాబాద్‌లో ఆటో, క్యాబ్‌ సేవలు పొందుతున్నవారి సంఖ్య గణనీయంగా పెరిగింది. వీరి అవసరానికి తగినట్లే నగరంలో ఆటోలు, క్యాబ్‌లు కూడా పెరిగాయి. మూడేళ్ల వ్యవధిలో హైదారాబాద్‌లో అదనంగా 26వేల ఆటోలు రొడెక్కాయంటే... వాటి అవసరం ప్రజలకు ఎంత ఉందో అర్థం చేసుకోవచ్చు.

ఆటోలే కాదు.. క్యాబ్‌లకు కూడా బాగా ఆధరణ పెరిగింది. నగరంలో దాదాపు 10వేల క్యాబ్‌లు, 1400 మాక్సీ క్యాబ్‌లు తిరుగుతున్నాయి. 2014లో కేవలం 700 క్యాబ్‌లు మాత్రమే ఉండేవి. అయితే, 2016 సంవత్సరంలోనే దాదాపు 5,700 క్యాబ్‌లు హైదరాబాద్ రోడ్లెక్కడం గమనార్హం.

ఒకవేళ మెట్రో రైలు సేవలు అందుబాటులోకి వచ్చినా... ఆటో, క్యాబ్‌లను దూరం చేసుకోలేమని నగరవాసులు తెలుపుతున్నారు. మదినాగూడకు చెందిన సాఫ్ట్‌వేర్ డెవలపర్ మీరా శర్మ TOIతో మాట్లాడుతూ.. ‘‘మా ఇంటి నుంచి మెట్రోకు వెళ్లాలంటే దాదాపు 4 కిమీలు ప్రయాణించాలి. ఇందుకైనా ఆటో లేదా క్యాబ్ ఎక్కాలి. అదేదో నేరుగా మేం చేరాల్సిన గమ్యానికే క్యాబ్ లేదా ఆటోలో వెళ్లిపోవడమే బెటర్’’ అని తెలిపారు. ఇదే అభిప్రాయం మరికొందరు నగరవాసులు కూడా వ్యక్తం చేశారు.

మొబైల్ యాప్‌ల సాయంతో క్యాబ్‌లను బుక్ చేసుకోవడం సులభతరం కావడంతోపాటు... అవి నేరుగా ఇంటి వద్దకే వచ్చి పికప్ చేసుకునే సదుపాయాన్ని ప్రజలు సౌకర్యవంతంగా భావిస్తున్నారు. క్యాబ్‌లకు గిరాకీ పెరుగుతోంది. దీంతో, పలు క్యాబ్ సర్వీస్ సంస్థలు తమ వాహనాల సంఖ్యను రెట్టింపు చేసే ప్రయత్నాల్లో ఉన్నాయి.