ముగ్గురిని బలిగొన్న నిర్లక్ష్యం

ఔటర్ రింగు రోడ్డు ప్రమాదాలకి నెలవుగా మారింది. ఒక ఘటన మరవక ముందే మరొక ఘటనతో నిత్యం ఔటర్ రింగు రోడ్డు ఏదో ఓ చోట రక్తమోడుతూనే వుంది. తాజాగా గురువారం నాడు ఔట‌ర్ రింగ్ రోడ్డుపై వేగంగా వచ్చిన ఓ కారు అదుపుతప్పి డివైడర్‌ను ఢీకొన్న ఘటనలో ముగ్గురు మృతిచెందగా మరొకరు తీవ్రంగా గాయపడ్డారు.

రంగారెడ్డి జిల్లా రావిర్యాల వద్ద ఔట‌ర్ రింగ్ రోడ్డుపై డివైడర్‌ను ఢీకొన్న కారు అనంత‌రం ప‌ల్టీలు కొట్టి బోల్తాపడింది. ఈ ప్రమాదంతో కారులో ప్రయాణిస్తోన్న నలుగురిలో ముగ్గురు అక్కడికక్కడే మృతి చెందారు. ప్రమాదం గురించి సమాచారం అందుకున్న పోలీసులు ఘ‌ట‌నాస్థ‌లికి చేరుకుని గాయాల‌పాల‌యిన క్షతగాత్రుడిని ఆసుప‌త్రికి త‌ర‌లించారు. ప్ర‌మాదానికి గురైన కారు నెంబరు AP 29 BV 5472 ఆధారంగా మృతుల కుటుంబసభ్యులకి స‌మాచారం అందించే ప్ర‌య‌త్నం చేస్తున్నట్టు పోలీసులు తెలిపారు.