శ్రీశైలం: వాహన పూజ అనంతరం భక్తులపైకి దూసుకెళ్లిన కొత్త కారు

కొత్త కారుకు వాహన పూజ నిర్వహించడం కొంత మంది భక్తుల పాలిట శాపమైంది. కారులో ఉన్న వ్యక్తి బ్రేకులకు బదులు యాక్సిలరేటర్ తొక్కడంతో ఆలయంలోకి దూసుకెళ్లింది. ఒక్కసారిగా దూసుకొచ్చి పలువురు భక్తులను ఢీకొట్టింది. శ్రీశైలంలోని సాక్షి గణపతి ఆలయం వద్ద శనివారం (మే 25) ఉదయం ఈ ప్రమాదం జరిగింది. ఈ ప్రమాదంలో ఏడుగురు భక్తులు తీవ్రంగా గాయపడ్డారు. వీరిలో ఓ మహిళ పరిస్థితి విషమంగా ఉంది. బాధిత భక్తులంతా సంగారెడ్డి వాసులుగా గుర్తించారు.

గుడిలో పూజలు చేస్తున్న భక్తులపైకి దూసుకెళ్లిన కొత్త కారు పూజారిదే కావడం శోచనీయం. పూజారి సిద్ధూ సాక్షి గణపతి ఆలయం వద్ద తన కొత్త కారుకు వాహన పూజ చేయించాడు. అనంతరం కారును ముందుకు తీసే క్రమంలో పొరపాటున యాక్సిలరేటర్ తొక్కడంతో అది ఆలయంలోని భక్తులపైకి దూసుకెళ్లింది.

ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు. ప్రమాదంలో గాయపడ్డ వారిని శ్రీశైలం ఆలయం అంబులెన్స్‌లో సమీపంలోని ఆస్పత్రికి తరలించి చికిత్స అందిస్తున్నారు. ఘటనకు సంబంధించిన పూర్తి వివరాలు తెలియాల్సి ఉంది.