యాప్నగరం

జగన్‌పై కేసు పెట్టండి.. కేంద్ర ఎన్నికల సంఘం ఆదేశం

ఆంధ్రప్రదేశ్ ప్రతిపక్ష నేత, వైఎస్సార్‌సీపీ అధినేత వైఎస్ జగన్ మోహన్ రెడ్డిపై కేంద్ర ఎన్నికల సంఘం ఆగ్రహం వ్యక్తం చేసింది.

TNN 23 Aug 2017, 11:11 am
ఆంధ్రప్రదేశ్ ప్రతిపక్ష నేత, వైఎస్సార్‌సీపీ అధినేత వైఎస్ జగన్ మోహన్ రెడ్డిపై కేంద్ర ఎన్నికల సంఘం ఆగ్రహం వ్యక్తం చేసింది. నంద్యాల ఉప ఎన్నిక ప్రచారం సందర్భంగా ముఖ్యమంత్రి చంద్రబాబు నాయుడుపై జగన్ చేసిన అనుచిత వ్యాఖ్యలను కేంద్ర ఎన్నికల సంఘం తీవ్రంగా పరిగణించింది. ఇది ఎన్నికల ప్రవర్తనా నియమావళి ఉల్లంఘన కిందకు వస్తుందని సీఈసీ పేర్కొంది. జగన్ వ్యాఖ్యలపై తక్షణం చర్యలు తీసుకోవాలని రాష్ట్ర ఎన్నికల అధికారులకు ఆదేశాలు జారీచేసింది. అలాగే జగన్ వ్యాఖ్యల సీడీలు, వీడియో క్లిప్పింగులను తమకు పంపాలని ఆదేశించింది.
Samayam Telugu cec orders probe against jagan mohan reddy for shoot chandrababu remark
జగన్‌పై కేసు పెట్టండి.. కేంద్ర ఎన్నికల సంఘం ఆదేశం


నంద్యాల ఉపఎన్నిక సందర్భంగా వైఎస్‌ జగన్‌ దాదాపు 13రోజుల పాటు నియోజవర్గంలో ప్రచారం నిర్వహించారు. రోడ్ షోలు, బహిరంగ సభలు నిర్వహిస్తూ తెలుగుదేశం పార్టీ, సీఎం చంద్రబాబుపై విరుచుకుపడ్డారు. ‘ఇచ్చిన హామీలు నెరవేర్చని ముఖ్యమంత్రి చంద్రబాబును నడిరోడ్డుపై కాల్చి చంపాలి.. ఉరి తీయాలి’ అంటూ పలుమార్లు వ్యాఖ్యానించారు. దీనిపై అప్పట్లో చంద్రబాబు కూడా స్పందించారు. ‘నన్నెందుకు ఉరితీయాలి. నేను చేసిన తప్పేంటి. రాష్ట్రాన్ని అభివృద్ధి బాటలో నడిపించడమే నా తప్పా? జగన్ ఉన్మాదిలా మాట్లాడుతున్నారు’ అని చంద్రబాబు కూడా కౌంటర్ ఇచ్చారు.

అయితే చంద్రబాబునుద్దేశించి జగన్ చేసిన వ్యాఖ్యలపై తెదేపా నేతలు రాష్ట్ర ఎన్నికల సంఘానికి ఫిర్యాదు చేశారు. కానీ వారు పట్టించుకోకపోవడంతో ఇటీవల తెదేపా ఎంపీలు రామ్మోహన్‌నాయుడు, నిమ్మల కిష్టప్ప తదితరులు కేంద్ర ఎన్నికల సంఘానికి ఫిర్యాదు చేశారు. దీన్ని పరిశీలించిన సీఈసీ విచారణకు ఆదేశించింది. జగన్‌ వ్యాఖ్యలు ఎన్నికల ప్రవర్తనా నియమావళి ఉల్లంఘన కిందకే వస్తాయని పేర్కొంటూ ఆయనపై కేసు నమోదు చేసి తక్షణం విచారణ జరపాలని రాష్ట్ర ఎన్నికల కమిషన్‌ అధికారులను ఆదేశించింది.

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.