గేమ్ మొదలయ్యింది.. ఇక యుద్ధమే: చంద్రబాబు

పవన్ టీడీపీని టార్గెట్ చేయడంతో... ఆ పార్టీ కూడా దూకుడు పెంచింది. జనసేనాని వ్యాఖ్యలకు కౌంటర్లను మొదలు పెట్టింది. ఎంపీలతో టెలీకాన్ఫరెన్స్ నిర్వహించిన చంద్రబాబు... వారితో కీలక వ్యాఖ్యలు చేసినట్లు తెలుస్తోంది. టీడీపీని దెబ్బ తీయడానికి మహా కుట్ర జరుగుతోందని అభిప్రాయపడ్డారట. పథక రచనలో చాలామంది పెద్దలు ఉన్నారని... స్థానికంగా కూడా కొంతమంది భాగస్వామ్యం అయ్యారన్నారట. తమిళనాడు తరహాలో ఇక్కడ రాజకీయం చేయాలని చూస్తున్నారని... బలమైన నాయకత్వం ఉన్నచోట... బలహీన పరచాలని బీజేపీ భావిస్తోందని చెప్పారట.

గేమ్ మొదలయ్యిందని... ఇకపై యుద్ధమేనన్నారట చంద్రబాబు. ఎలాంటి రాజకీయాలు చేసినా వెనక్కు తగ్గేది లేదని ఎంపీలకు తేల్చి చెప్పారట. ఎవరెన్ని కుట్రలు చేసినా రాష్ట్రాన్ని... టీడీపీని ఎవరూ ఏమీ చేయలేరని.. ఇలాంటి కుట్రలెన్నింటినో దాటుకుని వచ్చామని వ్యాఖ్యానించారని సమాచారం. ఐదుకోట్ల మంది తమ హక్కుల కోసం ముక్తకంఠంతో పోరాడాల్సిన సమయం వచ్చిందని పిలుపునిచ్చారు. ఏవైనా విమర్శలుంటే ఎన్నికలప్పుడు చేయాలి గానీ.. ఇది సమయం కాదన్నారు. బాధ్యత గల వ్యక్తిగా పవన్‌ రాష్ట్రం హక్కుల కోసం పోరాడాలని.. సీఎంను బలహీన పరచడం తగదని సీఎం అభిప్రాయపడ్డారట. విమర్శలు హుందాగానే ఉండాలని... తనను ఎవరు తిట్టినా, తిట్టించినా అవి తనకు ఆశీర్వాదాలేనని చెప్పుకొచ్చారట చంద్రబాబు.